Shillong, Jymmang 05
Ka North Eastern Indira Gandhi Regional Insti-tute of Health & Medical Sciences (NEIGRIHMS) ka la mynjur ban pynsangeh shwa ïa baroh ki jingthung kam hapoh ka Institute bad ban pynbeit ïa baroh ki kam bad ki jingdawa jong ka Khasi Students’ Union (KSU) hapoh ka shitaïew.
Ïa kane la pyntip da u Myntri bad Nongaiktien ka Sorkar, Bah Paul Lyngdoh hadien ka jingïa-lang bad ki bor pynïaid ka NEIGRIHMS, ba kynthup ïa u Director, Deputy Director ryngkat bad ki nongïalam ka KSU, hadien ba ki dkhot ka seng ki la pynlong da ka jingïakhih shong kyllaiñ mungor ha phyllaw ka Administrative Block NEIGRIHMS naduh ka 1 tarik mynta u Jymmang.
U Bah Paul u pyntip ruh ba ha ki khyndiat sngi ban wan un ïalam ïa ka kynhun jong ki dkhot ka KSU sha Delhi ban ïakynduh ïa u Myntri ka tnat ka Koit ka Khiah ka Sorkar Pdeng, na ka bynta ban ïakren ïa ki jingdawa kiba long shabar ka bor jong ki nongpynïaid ka NEIGRIHMS.
“Ka don ruh ka Governing Council jong ka NEIGRIHMS kaba khlieh da u Myntri ka Sorkar Pdeng bad ngi la rai ba ngin sa rah ïakren ruh ïa kine ki kam bad ka Governing Council,” u la ong.
Kane ka jingtuklar jong ka Sorkar Jylla ka long hadien ba ki dkhot KSU ki la pynlong da ka jingïakhih ban dawa na ka NEIGRIHMS ba ka dei ban pyntreikam mardor ïa ka bhah thungkam ba 80:20 ïa ki nos kynthei bad shynrang, ban pynjlan ïa ka rta thung kam, ban bishar thymmai ïa ka roster, ban buh ïa ka jaka pynlong eksam thung kam ha Meghalaya bad kiwei-kiwei.
“Namar kine ki jingjia ba la jia, ka NEIGRIHMS ka la rai ba kat bym pat pynbeit ïa ki kam kiba lah ban ktah ïa ka jingthung kam, ka NEIGRIHMS kan pynsangeh shwa ïa baroh ki jingthung kam bad ngi dei ban lah pynbeit noh ïa kine kiei-kiei hapoh ka shitaïew,” la ong u Myntri.
Na ka liang u Bah Paul u la kyntu ïa ki nongïalam ka KSU ba kin pynsangeh noh ïa ka jingshong kyllaiñ mungor, ha kaba u la pyntip ba ki nongïalam jong ka seng ki la ai ka jubab kaba sngewtynnat bad ki donkam ban pynskhem ïa ka rai da ka General Council.
