Washington, Jymmang:
Ka United States kan pyniaid ‘parade’ ia la ki shipai ha ka 14 tarik u Jylliew kum shi bynta ban rakhe ia ka jingdap 250 snem ka jingseng ia ka kynhun shipai jong ka US, la ong ka White House ha ka Sngi Thohdieng, ha kaba katei ka jingialang kan hap ruh ha ka sngikha ba 79 snem jong u President katei ka ri, Donald Trump.
Kumta la ong ba u Trump un pynkup burom ia ki shipai rangbah jong ka America, ki dkhot shipai kiba dang don ha ka kam bad ban pynpaw ruh ia ka jingkhraw jong ka tnat shipai katei ka ri da kaba phah ïaid pyni nam ia ki shipai jong ka ri ha katei ka sngi.
Namar la ong ba u Trump u la wanrah ia kane ka jingmut ban pyni nam ia ki shipai jong ka ri ha ka nongbah Washington ha ka samoi treikam ba nyngkong jong u, hadien ba u la leit sha ka jaka kilan met shipai ha ka Bastille Day ha France.
Hynrei la ong ba kane ka jingthmu jong u Trump ban pyniaid ‘parade’ ia ki shipai kylleng sawdong katei ka nongbah jong ka ri, ka lah ban pynduh ne pynjulor noh pat ia ki surok paidbah namar ka jingkhlaiñ bad jingkhia jong ki kali thma kiba kynthup ia ki tup- ki man bad kiwei- kiwei.
