United States, Jymmang:
Ka tnat Central Intelligence Agency (CIA) ha kane ka por ka la pynbna ba kan hap ban pynduh noh ia kumba 1,200 tylli ki kam, ha kaba kan hap ban pynsangeh treikam noh ia ki hajar tylli ki kam namar ka jingbym lah shuh ban siew tulop bad ban pynbiang ia ka ioh-ka kot kumba ka ju long baroh shi katta.
Namar ka sorkar jong u Trump ka la dep pynbna naduh kine ki por ba la leit, ba kan pynduh noh ia ka jingai jingkyrshan sha ka CIA bad kane ka la wanrah jingsngew-khia shibun eh ia katei ka tnat kaba ju ioh jingkyrshan na ka US naduh kaba sdang.
Haba iakren pat shaphang ka kaiphod, ki nong-rahktien jong ka CIA kim shym pynshai tikna hynrei ki la iathuh ba u Director katei ka tnat, u John Ratcliffe, u la thmu ban pynsangeh noh ia ki kam kiba bun jong ka tnat, ha kaba yn hap ban weng kam noh ruh ia kiba bun ki nongtrei jongka namar ka jingbym lah shuh ban tehlakam ia ka ioh- ka kot jong katei ka tnat.
Ka CIA ha kaba sdang jong une u snem ka la long ka tnat wad bniah jong ka US kaba nyngkong eh ban ïasoh bad ka prokram pynduh kam mon sngewbha ba la wanrah da u President ka US- u Donald Trump, uba la kular ban pynduna shi syndon ïa ki nongtrei jong ka sorkar pdeng da kaba pyrshang ban ialeh ban pynduna ia ka jingpynlut pisa jong ka sorkar US.
