Shillong, Jymmang 05
U Chief Electoral Officer (CEO) ka Jylla, Dr. B.D.R Tiwari ha ka Lah Sngi U Blei u la pynbna ba ka Election Commission of India (ECI) ka la pynkhreh ban sdang pyntreikam noh ïa ka ECINET, ka rynsan digital ka ban kynthup lang ïa palat 40 tylli ki Electoral Applications.
Katkum ka jingpyntip u CEO kane ka long da ka jingthmu ban don ka jingpynïaid ryntih bad ban pynsuk ïa ka rukom treikam na ka bynta ki 100 klur ngut ki nongthep vote bad ïa ki lak ngut ki ophisar ka tnat pynïaid ilekshon kiba don ha kylleng ka Ri.
U Dr. Tiwari u la pyntip ba ka la don ka jingpynïaid shakhmat ha ka ban khmih bniah ban pynthikna ba kan don ka jingshngaiñ bad ka jingtreikam kaba paka ha shwa ban sdang pyntreikam pura noh ïa kane ka rynsan.
Ka rynsan ECINET bad ka jingïaid shakhmat ban pynbeit ryntih ïa ki nongthep vote ka pyni ïa ka jingtrei shitrhem jong ka Election Commission ban pynïaid ïa ki kam ki jam katkum kane ka juk stad bad ban pynthikna ba ka kam kaba ïadei bad ka ilekshon ha ka Ri kan long kaba khuid bad kaba lah ban ïoh da baroh.
U CEO u la ong ba ka Election Commission of India (ECI) ka la shim ïa ka sienjam kaba khraw, bad ka dang shna ïa ka ‘digital interface’ kaba lah ban pyndonkam na ka bynta ki nongjied bad kiwei pat ki nongshim bynta, kynthup ki ophisar ba dei khmih ïa ka kam ilekshon, ki seng saiñpyrthei bad ki kynhun ha ka imlang sahlang.
U la ïathuh ba ka ECINET kan pynïasoh bad pynkylla dur ïa palat 40 tylli ki ‘mobile’ bad ‘web application’ ba la don lypa jong ka ECI.
“Ka ECINET kan don ïa ka User Interface (UI) bad ka (UX) kaba kham suk ban pyndonkam, da kaba pynbiang kawei ka rynsan na ka bynta baroh ki kam ba ïadei bad ka ilekshon. Ïa kane ka sienjam la saiñdur ruh ban pynduna ka jingbankhia jong ki nongpyndonkam na ka bynta ban download bad ïaid lyngba ïa ki ‘Apps’ kiba bun bad ban kynmaw ïa ki ‘login’ bapher-bapher,” la ong u CEO.
