Shillong, Jymmang 06
Ka Sorkar Jylla ka la shim khia ban pyndep noh ïa ka jingker sainar shiah ha shilynter ki khappud bad ka ri Bangladesh, ha kaba la bthah ïa ki Deputy Commissioner (DC) ba dei ha ki thaiñ khappud ba kin pynbeit mardor ïa ka jingshim jaka da kaba lum ïa baroh kiba don bynta, kynthup ïa ki nongïalam shnong bad ki trai jaka.
U Symbud Myntri Rangbah ba khmih ïa ka Kam Pohïing ka Jylla, Bah Prestone Tynsong ha ka Sngi Ba-ar u la lum ïa ka jingïalang bishar bniah halor ka jinglong jingman ha ki khappud ha kaba la shim bynta da ki DC bad la don lang ruh ki ophisar ka NBCC ryngkat u Inspector General (IG) BSF Meghalaya.
“Ngi don ka jingkyrmen ba thikna ba ha ki khyndiat taïew ngin lah ban pynbeit noh ïa kane ka kam,” la ong u Symbud Myntri Rangbah haba kren hadien ka jingïalang.
Haba pynpaw ïa ka jinglong jingman jong ka Ri baroh kawei bad kumjuh ha ka thaiñ Shatei Lam Mihngi kam da bha namar ki jaka khappud, u Bah Prestone u la ong, “Ki Deputy Commissioner ba dei ha ka thaiñ khappud kin pynbeit biang bad shong jingïalang biang bad baroh kiba don bynta. Kum ha Jaiñtia Hills, ngi don kumba 30-35 km ka jingjngai ka jaka ba ym pat dep ker sainar namar ba ïakynduh jingeh ha ka jingshim jaka. Mynta nga la bthah ïa baroh ki Deputy Commissioner ba kin peit biang bad shim ïa kane ka kam kum kaba kongsan tam.”
U la ong ba ka Sorkar Jylla ka kwah shisha ban pyndep ker sainar noh ïa kito ki bynta bym pat dep, khnang ba ki bor ka Sorkar Jylla bad Sorkar Pdeng kynthup ki BSF kin lah ban buddien haba ïadei bad ka jingwan rung be-aiñ ki briew shapoh ka Jylla.
U la ïathuh ba ki jaka ha khappud ki bym pat dep ker sainar ki long kumba 33-34 km ha shilynter ka khappud India-Bangladesh ha ki thaiñ West Jaiñtia Hills bad 7-8 km hapoh ka thaiñ East Khasi Hills.
Ha kaba ïadei bad ka jingdawa ki nongshong shnong ban ker sainar shiah naduh ‘Zero Line’, u Symbud Myntri Rangbah u la pyntip ba ka Sorkar Jylla ka la dep ban thoh sha ka Ministry of Home Affairs (MHA) ka Sorkar Pdeng ban bishar halor kane.
“Ki don katto-katne ki shnong kiba long pyrshah. Ki don ki kyndon bad jingïateh ki ri ka pyrthei, ba ki khappud jong kawei ka ri na kawei ka dei ban jngai 150 ‘yard’. Haba kwah ban ker sainar, kum ka India ngim lah ban ïaid lait ïa ka 150 ‘yard’. Hynrei, lada ka jingker ka hap ban ïaid katkum kane ka kyndon katto-katne ki shnong kin hap noh shabar u pud u sam ka Jylla. Ngi la thoh sha ka MHA ban pyrkhat ïa kita ki jaka ba ngi don kiba dei ki jaka ba shong ba sah briew, bad mynta ngi dang ap ïa ka jubab na ka MHA” u la ong.
Haba pynpaw ba ka jinglong jingman ha ki thaiñ khappud ka long kaba shngaiñ, u Bah Prestone u la ong ba baroh shilynter u pud u sam marjan bad ka ri Bangladesh ka long shngaiñ bad baroh ki tnat ki peitngor ïa ka jinglong jingman ban pynthikna ba ki nongshong shnong kin don ha ka jingshngaiñ.
