Shillong, Jymmang 06
Ka Khasi Students’ Union (KSU) Sengkmie hapoh ka jingïalam u Bah Lambokstarwell Marngar kum President, ha ka Sngi Ba-ar ka la ïoh ban ïakynduh ïa u Director ka North Eastern Indira Gandhi Regional Institute of Health & Medical Sciences (NEIGRIHMS) Shillong na ka bynta ban ïatai ïa kiba bun tylli ki mat kaba ka seng ka la buh.
Kane ka jingïakynduh ka KSU ïa u Director ka NEIGRIHMS ka dei hadien ba la dep ïatai ha ka jingïalang kaba la khot da u Myntri ka Sorkar Jylla Bah Paul Lyngdoh ha ka 5 tarik mynta u bnai. Ha kane ka jingïakynduh bad u Director ka NEIGRIHMS Prof. (Dr.) Nalin Mehta, ka KSU ka la aiti haduh shiphew tylli ki mat jingdawa lyngba ka jingthoh bad kyrpad ban khot kyrkieh ïa ka Governing Council ban pynbeit ïa kine ki mat ba ka seng ka la dawa.
Kine shiphew tylli mat jingdawa ki long ban pynjlan biang ïa ka rta thungkam sha ka 35 snem na bynta ki Nursing Officer bad kiwei de ki kam ha ki kyrdan bapher bapher.
Nangta dei ban thungkam Nos kumba 80 persen ïa ki kynthei bad 20 persen ïa ki shynrang. Dei ban pynlong Examination Centre ha Meghalaya ym dei shabar ka jylla bad kiwei de ki jingdawa ba ka seng ka la buh. Dei ban pyndam noh ïa ki kam kiba khlem lah pyndap hynrei dei ban khot da kaba thymmai.
Ha kaba khatduh ka seng ka la kyrpad ïa u Director ban khot kyrkieh noh ïa ka Governing Council ban ïakren ïa kiba bun ki mat khnang ban pynbeit ïa ki kynrum-kynram.
Haba ïakren bad u samla Donald V Thabah hadien ba la kut ka jingïalang bad u Director, u la ong haba la shong jingïalang bad ki bor pynïaid ka NEIGRIHMS ki don shibun ki jingdkoh ka jingtreikam namar ka seng ka la ïakren haba ïadei bad ka EWS Category namar ka la lap ba ka Sorkar India kan ym lah ban leh eksam biang shisien bym lah pyndap ïa ki hynrei haba la pule bha ïa ka bhah thungkam jong kane ka hospital, la lap ba ha ka EWS category ha ka rukom thungkam ha Nursing Officer la mang haduh 10 tylli.
U la ïathuh ba ki hynñiew tylli ki dei kiba la thungkam hynrei ki la iehnohkam hapoh shisnem, hynrei ym pat tip la kin leh biang ïa kitei ki kam bym lah pyndap ne kin khot thymmai beit. Shuh shuh u la ong ba ïa ki lai tylli ki kam ka NEIGRIHMS ka la dei ban thep kam biang hynrei la sngewthuh ba kan hap ban weng noh ban nym leh eksam biang hynrei kan pynkylla noh sha kiwei ki kyrdan.
U la ïathuh ba ha kawei kam ba thylli kaba ym lah ban pyndap, ka seng ka kyrpad ban rah noh sha ka Schedule Tribe category bad ban leh da ka jingpynbna kaba thymmai.
U la ïathuh biang ba kiwei ki jingdawa yn dang rah sha ka Ministry Health and Family Welfare jong ka Sorkar India.
