Nongstoiñ, Jymmang 06
Ha ka Sngi Ba-ar jong ka taïew, ka Hynñiewtrep Youth Council (HYC) West Khasi Hills ka la leit ban ujor bad aiti da ka jingthoh sha u Deputy Commissioner (DC) Supply ka West Khasi Hills halor ka jingkynnoh ba ka don ka jingduna kilo kaba jur ha u khaw ration kaba la ktah ïa ki paidbah.
Ka HYC West Khasi Hills hapoh ka jingïalam u President samla Lumlang Kharsyiemlieh u la ong ba ka seng ha kane ka jingujor ka la kyntu ïa u DC ban shimkhia ïa kane namar ba ka jingot kilo ïa u khaw ration da ki wholesalers ka la ktah eh ïa ki paidbah ha kaba kat nang mih ki sngi, ka jingot ka la kham bun.
U samla Lumlang u la ai nuksa ruh ba ka byrni kaba don 46 kilo ki thoh 52, kaba don 47 ki thoh 56 ter ter ha kane ka rukom hynrei ynda la poi ha shnong namar mynta ki dealer ha ki center shnong ki hap thew ha ki machine thymmai ba la pynbiang da ka ophis, ka Weighing Machine Scale kaba ki paidbah lyngba ki card bapher bapher ki ïohi, kim shah shuh ban ot kilo namar kane ka rukom ka poi haduh DC office, kumta ka seng ka sngewkmen ïa kane bad ka la ai mynsiem ïa ki paidbah ban lait na ka jingshah khate kilo, hynrei ynda la wad jingtip, kane ka Weighing Machine Scale ka dang treikam tang ha ki Dealer kiba rit hynrei ïa ki Wholesalers kam pat treikam.
Halor kane, ka seng ka dawa na ka Sorkar lyngba ka ophis DC ban sdang na ki wholesalers ne na FCI khnang ba kan long ka jingrat dien khong naduh tynrai.
“Phi sdang na ki shnong, ka mut uba wan shim khaw khatduh um ïoh khaw shuh namar u khaw la shah ot naduh FCI bad Wholesalers,” ong u samla Lumlang.
U samla Lumlang u la ong ba ka seng ka kyrpad ba ka ophis ha West Khasi Hills District ne ka Sorkar ka dei ban pyntreikam ïa ka Weighing Machine Scale ïa baroh, kata naduh kudam FCI haduh ki Wholesalers sa ha ki dealers, ha ki shnong kumjuh ym ban ñion ïa ki dealer bad ailad katba mon ïa ka FCI bad ïa ki Wholesalers.
U samla Lumlang u la ong ruh ba na ka liang u ADC u la kular ban shimkhia halor kane, bad na ka liang ka seng kan ïai ban ba dei ban pyntreikam ïa ka rukom thew thymmai ne system thymmai ka Weighing Machine Scale ha baroh naduh ki kudam FCI, ki Wholesalers haduh ki Dealers khnang ba u paidbah un ïoh ïa ka hok.
