Shillong, Jymmang 06
Ha ka janmiet jong ka Sngi Ba-ar, katba ki Nongïalam bad dkhot ka KSU West Jaiñtia Hills District Unit ki dang pynlong ka jingkhynra ïa ki dukan bar jylla ha ïew Jowai, la wan mih kynsan uwei na ki Nongïalam kynhun seng uba la kam trai ïa ki dukan bar jylla.
Ka KSU West Jaiñtia Hills District Unit hapoh ka jingïalam u President samla Laitphar Syngkrem, Vice President samla Chanbor War lem bad kiwei ki dkhot ka seng, ka la leit ban khynra ïa ki briew kiba dei ki bar jylla kiba wan sah beaiñ bad buh dukan beaiñ hapoh ka ïew Jowai. Ha kane ka jingleit khynra la don ki dukan kiba la khang lypa shwa tang shu ïoh jingtip ban wan khynra mynder da ka seng.
Ha kane ka jingkhynra la shem ba kiba bun hi ki dukan ki dei ki bym don ïa ki kot ki sla ban pynshisha lane wat tang ka Epic Card jong ki ruh kim don lait noh tang ïa ka NOC ba la ai da ka dorbar shnong, kumta ka seng ka la phah khang khyrdep lut ïa baroh.
Kaba la pynbitar bad pynsngewsih ïa ki Nongïalam bad dkhot ka KSU ha kane ka jingkhynra dukan bar jylla ka long ba la don pat uwei na ki Nongïalam kynhun sengbhalang na rilum Jaiñtia uba la kloi ban wan kam trai ïa ki dukan bar jylla nalor ba kita ki nongtrei kim shym la don ki kot ki sla kiba shisha ban pynthikna ba ki dei ki nong India.
Ha kane ka por ba wan kam trai da une u Nongïalam, ka la don ruh ka jingïapyni nia, ha kaba ki Nongïalam KSU ki la pyni ruh ïa ki kot ki sla ba kim biang satia.
Kane ka long katkum ka kyrwoh na u samla Juhhi Tariang, Information & Publicity Secretary jong ka KSU West Jaiñtia Hill District.
