Shillong, Jymmang 06
Ka kynhun ïalehkai phutbol ka Jylla ka la sdang da ka jingjop ha ka Khelo India Youth Games 2025. Kane ka la wan urlong hadien ba ka la lah ban pynliem noh ïa ka Chandigarh da 10-1 kol ha ka Sngi Ba-ar ha Patna, Bihar ha kaba u Ïaishanbok Buhphang bad u Samborlang Langte ki la ïoh hat-trick.
Kane ka kynhun hapoh ka jingïalam u Bah Jeffrey Warlarpih (coach) ka la don ha ka Group-A kaba kynthup lang ïa ka Odisha bad ka West Bengal. Te kumta ka Meghalaya kan pynkhreh ïa ka jingïakhun ba ar pyrshah ïa ka Odisha ha ka Sngi Palei.
Lah ban kdew ba ar tylli ki kynhun ki ban wan ha ki kyrdan ba hakhlieh na baroh ar tylli ki group kin ïoh rung sha ka semi final.
Kum ban shu pynkynmaw, ka Meghalaya ka la bat ïa ka nam lahduh ha u snem 2024 hadien ba ka la khur ïa ka takma ksiar ha Tamil Nadu bad ha u snem 2023 ka la khur ïa ka takma rnong. Ha kane ka lympung kaba la long ha Bihar, ka Jylla kan phah ïashim bynta haduh 10 tylli ki jait jingïalehkai kiba kynthup ïa ka Football kaba la rung lyngba ka direct entry, katba kiwei pat kiba la ïoh da ka wild card entry ki long ka Archery, Athletics, Bad-minton, Boxing, Cycling, Gymnastics, Judo, Shoo-ting bad ka Swimming.
