Shillong, Jymmang 06
U Symbud Myntri Rang-bah ka Jylla, Bah Prestone Tynsong u la kubur ba ka jingkwah wanrah lynti rel jong ka Sorkar India ka dei kaba shisha, hadien ba u Myntri ka tnat Railway, Ashwini Vaishnaw u la ong ba ka Sorkar India kam pat pynkut ïa ka jingthmu ban pynïasoh ïa ka Khasi Hills da ka lynti rel.
“Ka jingkren jong u Myntri ba khmih ïa ka tnat Railway ka dei kaba shisha. U (Myntri) la ong ba ka Sorkar India ka dang thrang ban pynïasoh ïa ka Jylla Meghalaya da ka lynti rel. Kane kam dei ba leh na ka bynta ka jingmyntoi jong ki (Sorkar), hynrei na ka bynta ka jingmyntoi ki paidbah ka Jylla,” la ong u Bah Prestone haba kren bad ki lad pathai khubor ha ka sngi Ba-ar.
Haba kdew ïa ka All Party Committee (APC) ba la thaw da u Myntri Rangbah, Conrad K Sangma dang shen, u la ong ba ïa ka jingïalang jong ka APC yn sa khot da u Myntri Rangbah hi ïa baroh kiba don bynta bad hangta yn sa ïasyllok.
“Ngin sa ïasyllok bad ïatai sani bha ha ka APC, bad ka dei ban don ka jingïasyllok kaba shai kdar hangta, bad hadien kata yn sa shim ïa ka rai,” u la ong.
Haba pynpaw ïa ka jingdonkam jong ka lynti rel ha ka Jylla, u Symbud Myntri Rangbah u la ong, “Wat na ka liang jong ngi, ha nga shimet nga sngew ba ngi donkam ïa ka lynti rel. Tangba, haba nga ong ba ngi donkam ïa ka lynti rel, ngi donkam ruh ban kynthup lang ïa baroh. Ngim lah ban ong ba nga kwah ka dei ban urlong. Namarkata, haba pynshong nongrim ïa kiei-kiei baroh, ngi la ïakren bad ngi la rai na ka liang ka Sorkar ban don ka All Party Committee bad ban don lang baroh kiba don bynta.”
Haba kylli halor ka rel kit mar-mata, u Symbud Myntri Rangbah u la ong ba ïa kane ruh yn sa ïakren bad hadien kata yn sa sngewthuh ïa ki jingduna bad jingeh ban pynïaid shakhmat ïa kane ka phang.
Haba kylli halor ka jingdawa ban ïoh shwa ïa ka Inner Line Permit (ILP) hashwa ban ïakren ïa ka lynti rel, u Bah Prestone u la ong, “Na kata ka daw nga ong ba ngi kwah ban ïakynduh shwa ïa ki. Na ka liang ka Sorkar ruh ngi ïakhun tyngeh ban ïoh ïa ka ILP, bad wat hapoh ka ïingdorbar thaw aiñ la mynjur ïa ka ‘resolution’. Ngi kwah ba ka ILP kan don bad ngin ïakynduh ruh ïa baroh kiba don bynta ba ngin ïakren ïa ka lynti rel bad ïa kiwei ki mat kiba don.”
