Jowai, Jymmang 06
Ka lympung ïalehkai District Cricket League 2025 ba la pynïaid da ka West Jaiñtia Hills District Cricket Association la hap ban pynsangeh noh hadien ka jingther u ‘lapbah ha ka Sngi Ba-ar ha madan Khliehtyrshi.
Ha ka jingshisha ki kynhun ki ban ïakhun ha kane ka sngi ka long hapdeng ka Mowkaiaw CYC bad ka Khliehtyrshi SC.
Haba phai sha ka jingïalehkai ka Mowkaiaw ka la jop kynting pisa bad ka la shimti ban tied nyngkong ha kaba ka la ïoh 132 run na ki 20 over bad shah pynhap 9 wiket. U Sanvert B. Kurkalang u la tied 42 run na ki 27 bol ryngkat 2 tylli ki ‘six’ bad 3 tylli ki ‘four’. U Wimisonroy Lyngdoh (not out) u la tied 20 run na ki 13 bol ryngkat 2 tylli ki ‘six’. Katba u Demi Dkhar u la shim 2 wiket ha ki 4 over na ka bynta ka Khliehtyrshi SC.
Haba wan shimti ïa ka pali ba ar, ka Khliehtyrshi SC ka la tied 8 run ha ki 3.4 over bad shah pynhap noh 2 wiket. Katba ka jingïalehkai ka dang ïaid kynsan la wan u slap ba jur bad pynpulom noh ïa kane ka jingïalehkai namar ka madan baroh kawei ka la lang da um smam.
Ka jingïalehkai ha ka Sngi Palei kan long hapdeng ka Moodymmai SC pyrshah ïa ka Evergreen Mukhla Mission ha ka por 8:30 mynstep.
