Shillong, Jymmang 06
Ka lympung ïalehkai District Level Inter School Athletics Meet 2025 ba la pynïaid da ka shlem treikam u District Sports Officer (DSO) East Khasi Hills ka la sdang ha ka Sngi Ba-ar ha SAI Training Centre, Shillong.
Ïa kane ka lympung ïalehkai ka ban neh haduh lai sngi kynthih la plie da ka Deputy Commissioner ka East Khasi Hills Kong R.M Kurbah ryngkat ka jingïadon lang u District Sports Officer Bah O. Mawthoh, kumjuh ki nonghikai, ki khynnah skul bad kiwei kiwei.
Ha kane ka kynti kaba mynta la sakhi ïa ka jingdon bun ki nongïashim bynta kiba la kot sha 822 ngut ki khynnah kynthei bad shynrang na 46 tylli ki skul jong kane ka district ban shim bynta ha la ki jong ki kyrdan ïalehkai, kita ka Under-14, Under-16 bad Under-18.
Ki skul kiba la lah ba sei bun ngut ki khynnah ïalehkai ki long ka St. Anthony’s HSS kaba la lah ban pynmih haduh 44 ngut ki nongïashim bynta, nangta ka H. Elias Memorial HSS kaba la sei 38 ngut ki khynnah bad ka Green Hill HSS na Sohryngkham kaba la sei 37 ngut ki khynnah. Katba ki skul kiba duna eh ki long ka Christian Acade-my Higher Secondary School bad ka Synod Higher Secondary School ki la sei tang mar iwei i nongshim bynta ha kane ka lympung.
Ki jingïalehkai kiba la pynlong ha kane ka lympung ki kynthup ïa ki jingïakop mareh bapher bapher, nangta ka High Jump, Long jump, Javelin Throw, Shot Put, Back Throw, Discuss Throw bad kiwei kiwei.
Ha kane ka sngi kaba nyngkong la sdang shwa da ki jingïakop mareh naduh ka 100 mitar, nangta ka 60 mitar, High Jump, Long jump, Javelin Throw, Shot Put, Back Throw bad ka Discuss Throw.
Te kumta ïa kane ka lympung yn pynkut ha ka Sngi Palei.
