Dubai, Jymmang:
Katkum ki khubor, la ong ba uwei nongkhaïi na Ri India uba sah ha Dubai, Balvinder Singh Sahni, un shah set patok bad shah beh noh na United Arab Emirates (UAE) halor ki kam thok pisa, kynthup ruh ia ka jingbei pisa be-aiñ ha ki katto katne ki kam thok jong u. Utei u heh spah uba la tip ruh kum u Abu Sabah, u la shah rai set patok haduh 5 snem ryngkat ka kuna T.500,000 (Rs 1,14,89,750). Ka ïing kashari jong ka Dubai, ka la hukum ruh ban kurup noh ia ka pisa kaba T.150 million (T.3,446 million) na utei u nongkhaii shwa ba katei ka ri kan beh noh ia u.
Wat la ka kyrteng jong utei u nongkhaïi ka la paw nam bha ha Dubai, hynrei la ong ba ha kane ka sien u la shah rai pynrem halor ka jingleh thok bad bei pisa be-aiñ haduh Dh150 million lyngba ka network jong ki kompeni thok bad ryngkat ruh ki kot- ki sla ba shu thok.
Utei u nongkhaii u la shah rai pynrem ryngkat bad ki 33 ngut kiwei pat, kynthup ia u khun jong u.
U Sahni, uba 53 snem ka rta, u dei u nongseng bad u Chairman jong ka kompeni Raj Sahni Group (RSG), kaba treikam ha UAE, US, India, bad ha kiwei kiwei de ki ri jong ka pyrthei. Katkum ki khubor ba la pyntip sha ki lad pathai khubor, ka jingdon jingem jong ka kompeni jong u ha Dubai ka kynthup ïa ki ïing sah jong ki Qasr Sabah ha Dubai Sports City, ka ïing sah jong ka Burj Sabah kaba 24 mala ha Jumeirah Village Circle, ki jaka khaii ha Bay Square, Business Bay bad kawei pat ka hotel ba san khlur ba la khot ka Dubai Sabah.
Ka kyrteng jong une u nongkhaïi ka dei kaba la bna nam bha ha katei ka ri bad u Sahni, u dei u briew uba heh spah haduh katta bad uba don ia shibun tylli ki kali ba rem dor tam bad u ju pyni ruh ia ki kali ba rem dor jong u ha ki rynsan Social Media. U la paw ha ki kotkhubor ha u snem 2016 hadien ba u la thied ïa u nombar kali D5 ha ka dor Dh33 million (kumba $9 million ha katei ka por) na ka bynta kawei na ki kali Rolls-Royce jong u.
