Shillong, Jymmang 06
Kawei ka ïing kaba don ha Umshing, Mawkynroh, Shillong ka la shah prong tuh ha ki runar bym lah ban ithuh bad ruh ban rah ei ïa ki tiar kiba shongdor da ki lak tyngka.
Katkum ka khubor na ki pulit la ong ba u Bah Tomanbha Lyngdoh u la ai ka jingujor ba ha ka 2 tarik mynta u bnai, ha ka por kumba 8 baje mynmiet, u la ïoh jingtip ba ki runar bym lah ban ithuh ki la dep ban prong tuh shapoh ka ïing jong u bad ban rah tuh ïa ki tiar ki tar.
Ki tiar kiba la shah tuh ki long lai tylli ki shower mixtures, kawei ka waste coupling, kawei ka cistern control plate, san tylli ki bib cocks, bad kiwei kiwei kiba shongdor kumba T.1.25 lak. Ha kiwei pat ki khubor, u Abhishek Sah u la ai ka jingujor ba ha ka miet jong ka 3 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AD-0742 na ka thaiñ Bivar Road, Shillong.
Kumjuh, u Seakious S Sangma u la ai ka jingujor ba ha ka 4 tarik mynta u bnai, ha ka por kumba 3 baje step phyrngab, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-N-0225 na ka thaiñ Bivar Road, Shillong.
Ha kawei pat ka khubor, la ong ba ha ka miet jong ka 4 tarik mynta u bnai, ki runar bym lah ban ithuh, ki la tuh ïa kawei ka arshaka kaba don ïa u registration number ML05-Q-9294 kaba dei jong u B Synrem, na ka ïingsah ka jong u, kaba don ha Upper Shillong.
