Shillong, Jymmang 06
U Myntri Rangbah ka Jylla, Conrad K. Sangma ha ka Lah Sngi U Blei u la jurip ïa ka jingpyntrei ïa ka Tura Medical College kaba dang ïaid shakhmat bad pynpaw ïa ka jingsngewhun halor ka jingtyllun sted jong ki kam ki jam.
U la pyntip ba yn ïaleh ruh ban pyndep ïa ka jingtrei bad jingpyntreikam ïa ka kolej ha ka samoi-pule ka ban wan.
“Jan 80% na ka kam ba la pyntrei ka la dep pura. Ka jingtyllun jong ka kam ka long kaba sngewhun, bad ngi kyrmen skhem ba ka bynta kaba kongsan jong ki jingtei ka kolej kan long kaba la khreh hapoh une u snem,” ong u Myntri Rangbah. U la pyntip ba ka Sorkar ka shimkhia ban khmih bniah ïa ka jingïaid jong ka jingtrei ban pyntikna ban kynjoh ïa ki thong ha ka por kaba biang.
“Ngi ïaleh katba lah ban sdang kloi ïa ka samoi-pule ha Tura Medical College,” u la bynrap. U Sangma u la pyntip ruh ba ka Sorkar ka dang wad ïa ki lad ban ïatreilang na bynta ban pynïaid bad pyntreikam ïa ka kolej, da kaba kdew ba ka jinglong trai ïa ka kolej kan sah bad ka Sorkar.
“Ka Tura Medical College kan shakri nyngkong eh ïa ki samla pule ka Jylla Meghalaya. Ka bynta kaba bun jong ki ‘seat’ yn buh kyrpang na bynta ki samla pule na ka Jylla, ban pyntikna ba ki samla jong ngi kin ïoh ïa ka jingpule laiñ doktor kaba kham bha,” u la ong.
Ka Tura Medical College ka don ïa ka thong ban pynkhlaiñ ïa ka jingpule ha ka liang ka koit ka khiah hapoh ka Jylla bad ki lad ai jingsumar ha Ri-lum Garo. Kum ban shu kdew hangne, ka Sorkar Jylla ka bei tyngka ban pynbha ïa ki lad ki lynti ban ïoh ïa ka jingsumar ha ki jaka ba kyndong, ban pynthymmai ïa ki ‘hospital’ Sorkar, bad ban thung ïa ki nongtrei kiba tbit ha ka liang ka koit ka khiah.
“Ka jingthmu jong ngi ka long ban tei ïa ka rukom ai jingsumar kaba khlaiñ bad kaba kynthup lang ïa baroh – kaba pynthikna ba ki jingshakri kiba paka ki long kiba lah ban ïoh da man la iwei-pa-iwei nongshong shnong, khlem da kheiñ ïa ka jinglong-jingman ka jaka,” u la bynrap.
