Shillong, Jymmang 06
Ka jingpyntreikam kaba la ap la slem haba ïadei bad ka Kad Liengsuiñ Baljek ha Ri-lum Garo mynta ka la jan poi sha ka thong, hadien ba ka Sorkar Jylla ha ka Sngi Ba-ar ka la soi ïa ki jingïateh kular ba kongsan halor ka Operations and Maintenance (O&M) jong ka Kad Liengsuiñ bad ka Airports Authority of India (AAI).
Ka tnad Transport ka Jylla ka la soi ïa ka soskular ka jingïateh (MoU) na bynta ka Operations & Maintenance (O&M) and Communications, Navigation & Surveillance/Air Traffic Management (CNS/ATM) na bynta kane ka Kad Liengsuiñ bad ka AAI ha Kad Liengsuiñ Baljek kaba ha West Garo Hills.
Ka MoU kan ai lad ïa ka AAI ban pynïaid ïa ki liengsuiñ kiba lah ban shong 20 ngut ki briew – kaba kdew ïa ka jingsdang kaba pura jong ka jingpynïasoh liengsuiñ na bynta ka Ri-lum Garo.
U Myntri Rangbah ka Jylla, Conrad K. Sangma uba la donlang ha kane ka jingïalang ban soi ïa ka MoU, u la ïaroh ïa kane ka sienjam kum ka lynti kaba kongsan ban ïaid shakhmat. U la kular ruh ïa ka jingkut jingmut jong ka Sorkar ban pynbha shuh-shuh ïa ka Kad liengsuiñ khnang ban lah pdiang ïa ki liengsuiñ kiba kham heh kum ka ATR-72.
U Sangma u la pynpaw shuh-shuh ïa ka jinglah jong ka Kad Liengsuiñ Baljek kum ka jaka pdeng ban pynpoi mar na bynta ka thaiñ da kaba buh jingmut ïa ka jingmyntoi ha ka jinglong-jingman ka jaka kaba jan tam bad ki ri ba marjan.
“Ka jingpyntreikam ïa ka Kad Liengsuiñ ka long ba ngi buh ïa ki nongrim jong ka jingthmu na bynta ki 30-50 snem ban wan,” u la ban jur.
Kum shi bynta jong kane ka jingïateh, ka AAI kan shimti ïa kane ka Kad Liengsuiñ ha ka nongrim jong ka Operations and Maintenance (O&M) na bynta ban pyntreikam ïa ki liengsuiñ kiba shong 20 ngut briew kumjuh ban sdang ïa ka kam ha ka ban ïoh ïa ka laisen ban pynïaid ïa kane ka Kad Liengsuiñ.
Hashuwa, ka Airports Authority of India (AAI) ka la aiti ïa ka Detailed Project Report (DPR) kaba la pynkhreh ha ki snem 2010 bad 2017 ha kaba ka Sorkar Jylla ka la shim jaka shuh sa 56.5 akar.
Ka Jylla ka la kyrpad ïa ka AAI ban shimti ïa ka Kad Liengsuiñ ha ka nongrim “as is where is” (kumba ka long, hangta ba ka don) ban sdang ïa ki jingpynbha bad ki rukom treikam kiba donkam.
Ha ka jubab, ka AAI ka la pynpaw ba ka kwah ban shimti ïa ka Kad Liengsuiñ bad ka la kyrpad ban shim ïa ka jaka kaba 125 akar na bynta ka ‘Phase-I’ (kynthup ïa ka 56.5 akar kaba mynshuwa), ryngkat ban shim shuh sa 115 akar ha ka por ban wan na bynta ka ‘Phase-II’ ha u snem 2020.
Ka Kad Liengsuiñ Baljek kaba don ha Jengjal, ka jngai kumba 30 kilomitar na Tura. La plie nyngkong eh ïa ka ha u snem 2008 da ka President ha kata ka por, ka Pratibha Patel, ha ryngkat ka jinghiar bad jingher banyngkong kaba seisoh jong ka liengsuiñ ‘Dornier’ 228 kaba don ïa ki jaka shong na bynta 20 ngut ki briew, hynrei ka la sah kumto khlem treikam shuh naduh katei ka por.
Ka Kad Liengsuiñ Baljek ka dei ka Kad Liengsuiñ kaba ar ha ka Jylla, nalor kawei pat kaba don ha Umroi, Ri-Bhoi District – ka Kad Liengsuiñ Shillong. Ka Shillong Airport ka dei ka Kad Liengsuiñ kaba bunkam bha ha kaba ki liengsuiñ ki her man ka por sha Kolkata, Delhi, Agartala, Dimapur bad kiwei-kiwei ki jaka.
Mynta ka pyntreikam ïa ki liengsuiñ ATR-72 bad kumba ka long, ka jingpyntrei ka dang ïaid shakhmat ban pynheh ïa ka lynti ïaid liengsuiñ jong kane ka Kad Liengsuiñ khnang ban lah pdiang ïa ki liengsuiñ kiba kham heh kum ka ‘Airbus 320’ bad ka ‘Boeing 737’.
