Mawkyrwat, Jymmang 06
Ki paidbah nongshong shnong jong ka 25 Mer bad Rilang ha ka 6 tarik u Jymmang 2025 ki la leit tur sha ophis Feedback Energy Distribution Company Limited (FEDCO) kaba don ha Pamdaba, kaba hap hapoh ka Ranikor Civil Sub Division ha South West Khasi Hills District.
Ka jingleit tur ki paidbah nongshong shnong sha katei ka ophis ka dei namar ka jingbym don bording hapoh kitei ar tylli ki shnong la kumba artaïew eiei wat hadien ba ki paidbah ki la dep ban pyntip bunsien.
Katkum ka kyrwoh khubor ba la phah da u Bah Brabis Wahlang, Sordar Shnong 25 Mer bad u Bah Saidot Dkhar, Secretary Shong Rilang, ki la ïathuh ba kaei kaba pynlyngngoh ïa ki, ka long ba ynda ki poi ha katei ka ophis ki la lap pynban ba ym don nongtrei ha ka ophis bad la ïoh jingtip ruh ba ki kali ba pyndonkam ha ka por leit shna bording ruh kim don bad kaba la pynsuba ba dei na kine ki daw kaba pynlong ïa ki paidbah ban shong dum khlem bording da ki taïew.
Kumta na ka liang ki ar shnong ki la kyrpad ïa ka ophis kaba peit ïa ka jingsam bording hapoh ka thaiñ Ranikor ba ka dei ban wan shna noh mardor ïa ka bording ha kitei ki ar tylli ki shnong. Nangta la maham ruh lada jia ba ka ophis ka shim sting kim banse ban leit tur biang sa shisien bad ban khang tala noh ïa katei ka ophis.
