Washington, Jymmang:
Ka sorkar jong u Trump ha ka Sngi Nyngkong ka la pyntip ba kan siew ïa ka bai leit bai wan bad kan ai $1,000 sha ki nongwan buhai shnong ba khlem kot- khlem sla lada ki kular ban leit phai hi noh da lade sha ki ri ba ki dei hok bad ba kin mih noh shi syndon na US.
Kumta ka sorkar US ka la ong sha kito ki phetwir khlem kot- khlem sla lada ki sngewthuh ba ki im ha US khlem ki kot- ki sla ha ka rukom kaba dei, ki dei ban pdiang ia ka jingtyrwa jong ka sorkar bad ka long kaba bha eh lada ki kloi ban mih hi noh da lade bad ka sorkar US ruh kan ai ia katei ka bai lut ksan bad ka jingïarap na ka bynta jong ki ban bteng ia ka jingim ha ki ri ba ki dei hok ban shong ban sah.
Ka tnat Department of Homeland Security (DHS) ha kane ka por, ka la ai jingiarap pisa ia ki nongwei kiba wan be-aiñ ha ka jingleit jingwan bad ka bai bam na ka bynta jong ki ba kin leit phai biang sha la ki jong ki ri bad kine ki jingiarap kin long lyngba jong ka CBP Home App.
Ka tnat DHS ka la ong ba ia ka bai-bam kaba $1,000 yn siew hadien ba la pynthikna ia ka jingleitphai jongki sha la ki jong ki ri lyngba ka app.
U President jong ka America, U Donald Trump, u la kular ha ka por ba u ïalap ilekshon ha White House, ban pynher krad lut ia ki million ngut ki nongwan buhai shnong be-aiñ ha US bad ki bym don kot don sla.
Kumta la ong ba ka sorkar US ha kane ka kynti, ka dang iai trei bad kohnguh ia ki jingthmu bad jingpyniaid jong u Trump kumba u la thmu naduh shuwa ba un shimti ia ka shuki President jong ka US sa shisien pat ha une u snem 2025 hadien ba u la jop ia ka ilekshon President pyrshah ia ka kyrtong ba la pynmih bujli da u President barim ka US- u Joe Biden.
Ha kajuh ruh ka por, u Trump naduh shuwa baun shimti ia ka shuki President, u la kular ba un ialeh ban pynkut noh shi syndon ia ka thma jong ka Russia hapoh Ukraine, un tang shu ioh hi ban shong ha ka shuki President jong ka US. Hynrei haduh mynta, kane ka kam ka dang sah teng ba ka long kaba eh ia ka US ban pyniasuk bad ban wanrah ka jingiabeit hapdeng ka Russia bad Ukraine kumba la iohi ia ka jinglong jingman ha kane ka por ba mynta.
