Khliehriat, Jymmang 06
Kawei ka longkmie na ka shnong Umkiang, Kong Ribon Pohshna, ka la ujor da ka ejahar ha u Officer In-Charge jong ka Umkiang Police Patrol Post halor ka jingwan thombor ha ka ïing jong ka, da u briew ba suba ba dei u nong Bangladesh, ha ka step phyrngab jong ka 5 tarik, Jymmang, 2025.
Ha ka ujor, ka Kong Ribon Pohshna, ka ong katba ka dang thiah ryngkat bad ki khun jong ka ha ïing, ha ka por kumba 3:00 baje mynstep la wan rung jubor u briew uba rah ïa ka wait ha kti bad phong da ka sopti lyngkot bad ka jaiñboh (longgi).
Katei ka longkmie ka ïathuh ba namar ka jingsheptieng kam nud ban kyang ne pyrta briew ban ïarap, hynrei ka shu duwai ba kan lait na kano kano ka jingjia ba sniew.
Hynrei ha kata hi ka por utei u briew u la rong tuh ïa ka mobile jong ka, kaba don artylli ki SIM card – kawei kaba dei jong u kurim jong ka, u David Munda (No. 60006614648) bad kawei pat kaba dei jong ka hi (No. 6009699287). U la rah ruh ki slipar, shatri bad u kwai shi byrni.
Hadien ba u la mih na ïing, ka Kong Ribon ka la pyrta briew bad ki paramarjan ki la wan ïarap. Ka la ong ba katkum ka jingïathuh ki paramarjan kiba beh thong ïa utei u briew, la suba ba don kumba saw ngut ki nong Bangladesh kiba la rung beaiñ shapoh ka shnong Umkiang.
Katei ka longkmie ka la pynpaw ba katei ka jingjia ka la pynlong ïa ka ban sheptieng bad pynlong ruh ïa ka ban ym nud shuh ban sah ha ïing.
Ka la kyrpad ïa ki bor pulit ban shimkhia mardor bad ban pynïoh biang ïa ka mobile bad ki sim card jong ka, ba la shah rong tuh bad ban pynthikna ïa ka jingshngaiñ jong ka bad jong ka shnong nangne shakhmat.
