Jowai, Jymmang 06
Ka SCA ‘B’ ka la jam sha ka final ha ka Under-16 Boys Inter District Cricket Tournament 2025, hadien ba ka la pynliem noh ïa ka EKHCA da 9 wiket ha ka Lah Sngi U Blei ha madan Mukhla.
Ha kane ka jingïakhun semi final jong ka Zone-1, ka EKHCA ka la kam trai ban tied nyngkong ha kaba ka la ïoh tang 80 run bad shah pynhap 10 wiket ha ki 22.5 over. U Guiding Sohkhlet u la tied 29 run na ki 32 bol ryngkat 7 tylli ki ‘four’. Katba u Navneet Sah bad u Ynsanhame Tang ki la ïoh mar 4 wiket na ka bynta ka SCA ‘B’.
Haba wan shimti ïa ka pali kaba ar, ka SCA ‘B’ ka la lah ban kynjoh sha ka thong da kaba ka la tied 86 run na ki 14.3 over. U Suraj Chettri sa shisien u la pyni ïa ka sap ïalehkai jong u ha kaba u la tied 57 run (not out) na ki 46 bol ryngkat kawei ka ‘six’ bad 8 tylli ki ‘four’. Kumjuh u Prasant Kumar (not out) u la ïoh 17 run na ki 21 bol. Katba u Pynkhraw Jomati u la shim shi wiket na ka bynta ka EKHCA ha ki 2.3 over.
Ha kawei pat ka jingïalehkai semi final Zone-2 kaba la pynlong ha Mendipathar pat, ka TDCA ka la jop ïa ka RBDCA da 20 run.
Te kumta ka jingïakhun final kan long ha ka 7 tarik mynta u bnai ha madan Thad Mukhla ha ka por 8:30 baje mynstep hapdeng ka SCA ‘B’ pyrshah ïa ka TDCA.
