Shillong, Jymmang 06
Ka Sorkar Pdeng lyngba ka Ministry of Home Affairs (MHA) ka la bthah ïa baroh ki Jylla ban pynkhreh ïa ka thma da kaba pynlong ïa ki ‘Mock Drill on Air Raids’ ha ka 7 tarik mynta u bnai.
Katkum ka jingpynbna ba la pynmih da ka MHA, ha Meghalaya ïa ka ‘Mock Drill’ yn pynlong ha ki lai jaka, kata ha Shillong, East Khasi Hills, Jowai, West Jaiñtia Hills bad ha Tura, West Garo Hills.
Katkum ka jingbthah, ha ka ‘Mock Drill’ la phah ban don ki Control Room/Shadow Control Room ban pynriew ïa ki Air Raid Siren, ban hikai ïa ki paidbah bad ki khynnah kumno ban ïada ïalade lada jia ba shah hiar thma.
Nalor kane, la bthah ruh ban pyndum tliw ne ‘Crash Black Out’, ban ïada bad buhrieh ïa ki jaka ba kyrpang, bad shuh-shuh ban pynkhreh kumno ban phah phet ne pynkynriah (Evacuate) ïa ki briew.
Kane ka hukum jong ka Sorkar Pdeng ka long hadien ba la jur ka jingïakynad hapdeng ka India bad Pakistan, hadien ba ki lehnoh Pakistan ki la siat ïap ïa 26 ngut nongjngoh kai ha Pahalgam, Jammu & Kashmir ha ka 22 tarik Ïaïong mynta u snem.
Ha kaba ïadei bad ka jingpynkhreh ka Jylla ïa kane ka jingbthah jong ka MHA, ka tnat Civil Defence & Home Guards jong ka Jylla kan pynlong ïa kane ka Mock Drill ban ai jinghikai kumno ban ïada haba shah hiar thma na suiñ.
Ha ka byrta ba la pynmih da u Senior Staff Officer & Addl. PRO ka Directorate of Civil Defence & Home Guards, Bah PH Shylla u la pyntip ba ïa kane ka Mock Drill yn pynlong naduh ka por 4 baje janmiet, bad ha ka por 6:30 janmiet kan don ka jingriew siren bad hadien ka siren kan don ka jingpynlip ïa ka bording ilektrik ban dum beit tliw ne ka ‘Black Out’ kumba 2 minit.
Na ka liang ka tnat ka la kyrpad ïa ki paidbah ba kim dei ban syier, namar ïa kane yn leh kum shi bynta jong ka jingpyni nuksa kumno ban ïada lada shah hiar thma na suiñ.
