Shillong, Jymmang 06
Ka NorthEast United Football Club (NEUFC) ryngkat ka jingïasnoh kti lang bad ka Meghalaya Football Association (MFA) kan pynlong ïa ka prokram jied khynnah ïalehkai phutbol mynta u bnai ha East Khasi Hills bad ha West Jaiñtia Hills.
Kane ka klob Indian Super League (ISL) kan pynlong ïa kane ka prokram jied khynnah ïalehkai Under-17 ha ka 12 bad 13 tarik mynta u bnai ha Shillong kata ha madan MFA, Polo. Ka NEUFC kan hiar sha West Jaiñtia Hills ban pynlong ha ka 14 bad 15 tarik mynta u bnai ha Wahïajer Multipurpose Sports Complex Stadium.
Kat kum ka kyrwoh ba la pyllait da kane ka klob, la ong ba ki khynnah ïalehkai kin dei kiba la kha hapdeng u snem 2009 bad 2010, katba ki ban don hapoh ka kynhun ‘reserve team’ kin dei kiba la kha hapdeng u 2005 haduh 2008. Ki khynnah ki dei ban wanrah lang ryngkat ki kot ki sla ban pynshisha ïa ka snem kha kum ka syrnod sngi kha, Aadhaar lem bad ka form kaba ki hap ban pyndap bad kin hap ban poi ha kitei ki jaka ha ka por 6 baje mynstep.
