Shillong, Jymmang 07
Na ka bynta ban pynkhreh lypa lada wan ka thma hapdeng ka India bad ka Pakistan, ka tnat Directorate of Civil Defence & Home Guards jong ka jylla ka la pynlong ïa ka ‘mock exercise’ da kaba pynriew siren ha sor Shillong ha ka sngi Balang ka 7 tarik Jymmang 2025 ha ka por 6:30 janmiet.
Hadien ba la pynriew ïa ka siren, la bud ka jingpynlip bording ha man ki thliew ïing bad ki jaka treikam ha Shillong kumba ar minit eiei.
Haba ka jingpynlip bording ka la ïaid kumba ar minit eiei, ka la don biang ka jingpynriew siren sa shisien.
Wat la ka la don ka jingbthah ban pynlip bording hadien ba la riew siren hynrei ki don ki jaka ba dang don ki jingthaba namar ki don ki bording kiba meh kiba pynïeng harud surok.
Kane ka jingpynriew siren ka dei kaba la bthah da ka tnat Kam Pohïing ka Sorkar India kum shi bynta ban pynkhreh lypa khnang ba ki paidbah kin ym kyndit ne sheptieng lada wan ka thma ha kano-kano ka por hadien ba ki lehnoh ki la leit ban synreit kuli ïa ki 26 ngut ki ‘riew paidbah ha Pahalgam ha ka 22 tarik Ïaïong 2025.
Kumjuh, ka India ha kane ka sngi ha ka por mynstep ka la ïoh ban hiar thma ïa ki ktem lehnoh kiba don ha Pakistan lyngba ka ‘Sindoor Operation’ da kaba siat da ki namding sha khyndai tylli ki ktem lehnoh.
Ha kane ka jingpynriew siren, ki don katto katne ki dong ha nongbah Shillong ki bym shym la ïohsngew wat la ka la don ka jingpyntip lypa na ki bor Sorkar.
