Shillong, Jymmang 07
Ka kol ba la thep khatduh da u Davide Frattesi lyngba ka jingai por tam (extra time) ka la biang pura ïa ka Inter Milan ban jam sha ka final ha ka Champions League. Kane ka la wan urlong hadien ba ka la pynliem noh ïa ka Barcelona da 4-3 kol na ka bynta ban tam 7-6 ha ka aggregate.
Une u rangïalehkai shapdeng ka Italy u la ïoh ban thep ha ka minit kaba 99 ha ka sngi Balang ha San Siro na ka bynta ban pynurlong ïa ka jingjop hakhmat ki nongkyrshan.
Te kumta ka Inter kan pynkhreh ïa ka jingïakhun ha ka 1 tarik u Jylliew ha Munich bad ka la khmih lynti ban rah ïa ka nam jop kaba saw kane ka lympung.
U Frattesi, uba la pynskhem ïalade kum u rangïalehkai ba lah ban shaniah na ka bynta ka Inter, u la pyni ïa ka jingtbit jong u ban thep kol ha ka wat kaba nyngkong jong ka quarter final pyrshah ïa ka Bayern Munich.
“Ka long kaba phylla, ngam tip shuh ban ong aiu. Nga la pyrkhat hadien ka jingïalehkai bad ka Bayern ba ngam lah ban sngew ïa kijuh ki jingsngew, hynrei mynta ka miet ka long kaba kham phylla shuh shuh,” la pynpaw u Frattesi ha kawei na ki lad pathai khubor hadien ba la kut ka jingïalehkai.
“Da shisha kane ka la long ka kam jong nga. Ngam shym ïoh ka jingkyrkhu lyngba ka sap kaba phylla, hynrei ngam ju shah rem bad nga don ka jingngeit kaba skhem bad kane ka dei ka bainong na ka bynta ka jingpyrshang bad jingaiti lut jong nga.”
Ka Inter ka la shah rem ha ka lympung Serie ha ka Napoli, kaba don jingkyrmen ban long ka lahduh, katba ka AC Milan ka la la lah ban khanglad noh ïa ka na ka Italian Cup.
Mynta ka Barcelona ka hap ban pynleit jingmut ban ïai bteng ban pynneh ïa ki saw point khnang ban ym ailad ïa ka Real Madrid ha ka lympung La Liga bad kaba duh da ka said ban khur ïa ka nam lahduh mynta ka aïom.
Ha ka kylla step ka Inter ka la ïoh ban thep ar kol lyngba u Lautaro Martinez (21′) bad u Hakan Calhanoglu (45+1) lyngba ka penalty. Hynrei ka Barcelona ka la wanphai da ka jingkhlaiñ bor ha ka kylla miet na ka bynta ban pynphai kylla lai kol lyngba u Eric Garcia (54′), Dani Olmo (60′) bad u Raphinha (87′). Hynrei u Francesco Acerbi (90+3′) u la lah ban pynïakhaid kylla na ka bynta ka Inter hashwa ba u Frattesi un thep ïa ka kol kaba khatduh ha ka extra time bad ban khur syndon ïa ka jingjop.
Lah ban kdew ba ha ka wat kaba nyngkong jong ka semi final, kitei ki kynhun ki la ïakhaid mar 3-3 kol.
