Washington, Jymmang:
Ar snem hadien ba la lap ia ka met jong ka khynnah rit napoh ka jaka buh jaiñ kaba la buhrieh ha kawei ka ïing kaba la iehnoh ha Indiana, ka kmie jong kane ka khynnah ha kata ka por pat ka la phla ba ia katei ka kam thombor la leh da u samla jong ka hi.
Ia katei ka long-kmie la ithuh kyrteng kum ka Madison Marshall. Ka la phla halor ka jingdonkti pyniap ia katei ka khynnah rit ha ki por ba la leit bad kumta la ong ba ka Marshall ka lah ban shah set patok haduh kumba 25 snem namar ka jingbym shimkhia ia utei u briew uba don jingiadei bad ka.
Ka Marshall ka la mynjur ban mudui da ka mukotduma pyrshah ïa u samla barim jong ka, u Roan Waters, uba shah kynnoh ba u la shoh ïa ka khun kynthei jong ka, kaba dang shisnem ka rta, ka Oaklee Snow, haduh ba kan da ïap syndon ha katei ka jingjia kaba la jia ha u snem 2023. Shuh shuh ruh katei ka longkmie ka la iathuh ba ka la iarap ia u Waters, u bym dei u kpa jong katei ka khynnah, ban buhrieh ia ka met jong katei ka khynnah bad ban pynduh-pyndam ia ki sabut baroh hadien ba u la pyniap ia ka. Hynrei ka la kynnoh ruh ba dei utei u briew uba la khanglad ia ka ban phone sha ki pulit bad ki bor pyniaid ban pan jingïarap ha katei ka por.
