Jammu, Jymmang 07 (UNI)
Kumba 12 ngut ki ‘riew paidbah, kynthup ïa kawei ka longkmie bad saw ngut ki khynnah, ki la ïap bad haduh 60 ngut kiwei pat ki la mynsaw hadien ba ka Pakistan ka la pyndonkam ïa ki jingsiat pynbthei bad jingsiat suloi kaba jur ha ka Sngi Balang ha Poonch Sector jong ka Jammu & Kashmir.
Kane ka jingsiat ïa ki jingpynbthei na shiliang sha shiliang khappud ka la sdang hadien ba ki shipai India ki la ther da ki jingpynbthei namding sha khyndai tylli ki ktem lehnoh ha Pakistan bad Kashmir (ba la synshar da ka Pakistan – PoK) ban kput kylliang ïa ka jingshah thombor ha Pahalgam ha ka 22 tarik u Ïaïong kaba la ïalam sha ka jingïap jong 26 ngut ki ‘riew paidbah.
Ki tyllong khubor ki ïathuh ba ha ka jingsiat kaba jur na ka Pakistan ha ka por mynmiet, kawei ka longkmie, 4 ngut ki khynnah napdeng ki 12 ngut, ki la duh ei la ka jingim, katba 60 ngut kiwei pat, ki la mynsaw ha Poonch Sector.
“Kawei ka longkmie ka la ïap hadien ba u jingpynbthei ba la siat na shiliang khappud u la bthei ha ïingsah jong ka katba ka khun jong ka (13 snem) ka la mynsaw,” ïathuh ki tyllong khubor ba tikna.
Ka distrik Poonch kaba ha khappud ka la shah ktah jur na ka jingshah siat jingpynbthei ha ki shipai Pakistan, da kaba bynrap, ki la ong, “kumba 20 ngut ki briew ki la mynsaw ha kiwei pat ki bynta jong ka Poonch Sector bad ha ka thaiñ Thandikassi jong ka Rajouri, 4 ngut ki briew kynthup ïa 2 ngut ki kynthei ki la mynsaw.”
“Ki katto-katne ki ïing bad ki kali ruh ki la shah pynjulor ha ka jingsiat jingpynbthei kaba jur da ka Pakistan,” ki la bynrap.
Ki la ong ba nalor ka thaiñ Mankote, ki shipai India ki la jubab ha ka rukom kaba biang tam ïa ki shipai Pakistan ha ki thaiñ Krishna Ghati, Shahpur, Laam, Manjakote bad Gambhir Brahmana ha Rajouri.
Kitei kiba la khlad noh ki dei ba la tip kyrteng kum ka Ruby Kour (33 snem), Mohd Zain (10 snem), Mohd Akram (42 snem), Amarjeet Singh (47 snem), Maryam Khatoon (7 snem), Vihaan Bhargav (13 snem), Amrik Singh (54 snem), Ranjit Singh (48 snem), Zoya Khan (12 snem), Shakeela Bi (41 snem), Mohd Rafi (40 snem) bad Mohd Iqbal (45 snem), baroh ki nongshong shnong ka Poonch.
Ha kajuh ka por, ki shipai kham hashuwa ki la ïathuh ba ha ka miet jong ka 6-7 tarik Jymmang, ki shipai Pakistan ka la siat khlem nongrim ba kynthup ïa ka jingsiat ïa ki jingpynbthei na ki jaka ba don sha shiliang ka ‘Line of Control’ bad khappud bar-ri, mar pyrshah ïa ka Jammu & Kashmir.
Ka ophis jong u Divisional Commissioner Jammu ka la bthah ruh ban khang lut ïa baroh ki jaka pule ha san tylli ki distrik khappud jong ka thaiñ Jammu.
“Halor ka jinglong-jingman kaba mynta baroh ki Skul, Kolej bad jaka pule ha Jammu, Samba, Kathua, Rajouri bad Poonch kin khang khyrdep mynta ka sngi,” ka la thoh ha ‘X’.
“Namar ka jinglong-jingman kaba dang ïaid, la khang ïa ka Kad Liengsuiñ Jammu (IXJ) na ka bynta ki liengsuiñ paidbah haduh ban da pynbna da kumwei pat bad la ai jingmut ïa ki nongleit-nongwan ba kin da peit bha haba ïadei bad ka jingleit jong ki bad ban khmih bniah ïa ka jinglong-jingman jong ki liengsuiñ,” ong u heh ophisar.
Hynrei la ïoh jingtip ruh ba ki don ki jingbthei kiba jur ha Baramulla, Kupwara bad Uri ha ki bynta jong ka Kashmir.
Ki nongshong shnong ki la ïathuh ba katto-katne ki ïing ki la shah pynjulor ha katei ka jingbthei kaba jur kaba la sdang naduh ka por 11 baje mynmiet.
Hynrei, da ki jingpynbeit kiba la don lypa ban pynkynriah ïa ki briew sha ki jaka kiba kham shngaiñ hapdeng ka jinglong-jingman kaba mynta, ki bor distrik ka Poonch ki la pynlong ka jingkhmih bniah ïa ki lad jingpynkhreh ha ki jaka sah bapher-bapher ba la buh kyrpang.
Ka kynhun jong ki heh ophisar ba kynthup ïa u ADC, u Assistant Commissioner Revenue (ACR), u CPO, bad u Tahsildar Haveli, ki la leit jngoh ïa ki jaka sah ba la tyrwa ban khmih bniah ïa ka jinglong ba la khreh jong ki jaka kumjuh ban pyntikna ba baroh ki lad jingpynbiang bad jingkyrshan ki treikam.
Ki jaka ba la buh kum ki jaka sah na ka bynta kito kiba kwah ban kynriah ki long ka Caramel School, Chandak, Dingla University Campus, Ishat ul Uloom Chandak, Higher Secondary School (HSS), Chandak, GHSS Lassana, Government High School (GHS) Sanai, Government Middle School (GMS) Sanai, GHSS Seri Khawaja, Polytechnic College, Sathra.
Ki bor synshar ka la pyntikna ïa ki paidbah ba ki jingshakri kiba kongsan kynthup ïa ka jaka sah, ka bam, bad ki jingïarap ha ka liang ka koit ka khiah ki don ha baroh kine ki jaka sah, katba la pynshlur ïa ki briew ban pyndonkam ïa kine ki jaka lada ki kwah ban kynriah, ong u nongaiktien.
Ki pulit jong ka Jammu ha ka ‘Advisory’ sha ki paidbah ki la kyrpad ban ym sam, buh, ne pynphriang ïa kino-kino ki jingthoh ba ïadei bad ki jingpynkynriah kam pahara, ka ïaid ka ïeng ha ka distrik.
Shuh shuh la pynkhlaiñ ïa ka jingpahara ha baroh shilynter khappud bar-ri kumjuh ha ki distrik Kathua, Samba bad Jammu, la ong uwei u heh ophisar bad na ka liang ka BSF ka long kaba peitngor haba ïadei bad ka jinglong-jingman.
Halor ka jingshah thombor ha Pahalgam, ka India ha ki kynta step jong ka Sngi Balang ka la ther namding ha Kashmir (ba la synshar ka Pakistan) bad ha Pakistan ha ki jaka bapher-bapher pyrshah ïa ki ktem lehnoh.
Ki shipai India ki la sdang ïa ka ‘Operation Sindoor’ da kaba ther namding ïa ki jingtei jong ki lehnoh ha Pakistan bad Jammu & Kashmir (ba la synshar da ka Pakistan) ha kaba la saiñdur bad bthah ïa ki kam thombor lehnoh pyrshah ïa ka India, ong ka kyrwoh jong ka tnad ïada ri.
