Islamabad, Jymmang:
Katkum ki khubor, la ong ba 7 ngut ki shipai Pakistan ki la kyllon iap na ka jingbthei bom ha ka thaiñ Southwest jong ka nongbah Balochistan, ha kaba 5 ngut kiwei pat ki la mynsaw ha katei ka jingjia ha ka Sngi Ba-ar.
Namar la ong ba ki kam thombor jong ki lehnoh ki la nang jur ha katei ka thaiñ Balochistan, kaba don markhap bad ka ri Afghanistan kumjuh bad ka Iran. Ka jingthombor ki lehnoh ka la nang jur naduh ba ki la sdang ban ialeh pyrshah ia ki bor pyniaid ka Pakistan ha kine ki katto- katne snem mynta.
Ka tnat shipai jong ka Pakistan ka la pyntip ba ki lehnoh Baloch Liberation Army (BLA) ki la leit thombor ia kawei ka kali kaba kit ia ki bor pahara da u bom ba shu shna hi bad kane ka la jia ha ka shnong Mach kaba don hapoh ka distrik Kachhi, ha kaba 7 ngut ki bor pahara ki la duh ei ia ka jingim ha katei ka jingjia.
Nalor kitei kiba khlad, sa 5 ngut kiwei pat ki dei kiba don lang ha katei ka kynhun ki bor pahara bad kiba la mynsaw hadien ka jingbthei jong utei u bom bad la pynkit noh ia ki da ka liengsuiñ naka bynta ki jingsumar ba kyrkieh.
Kane ka jingjia ka la jia ha ka por shiteng sngi, ha katei ka thaiñ rilum kaba don ia shibun ki par dew-iong bad katei ka thaiñ ka dei kaba ju shah thombor khah-khah ha kitei ki lehnoh.
Tad haduh ba la pynmih ia kane ka khubor, ym pat shym la don kano- kano ruh ka kynhun lehnoh ka ban kam trai bad shim jingkitkhlieh halor katei ka kam thombor. La ong ruh ba palat 200 ngut ki briew, kham bun hi ki dei ki dkhot jong ka tnat shipai Pakistan, kiba la duh ei ia ka jingim ha kum kitei ki jingjia naduh ka 1 tarik u Kyllalyngkot.
Da ki phew ngut ruh ki riew paidbah bad ki bor pahara ki la khlad ha kawei ka jingjia, ha kaba ki lehnoh BLA ki pyni bor bad kerkut ia ka rel kaba don ia ki spah ngut ki pasenjar kiba shong ha ka, ha ka jingjia kaba dang shu dep jia shen ha u Lber.
