New Delhi, Jymmang 07 (UNI)
Kham hadien jong ka ‘Operation Sindoor’, u Myntri Rangbahduh ka ri, u Narendra Modi, ha ka Sngi Balang, u la pynïaid ïa ka jingïalang jong ka Kynhun Myntri bad ïaroh ïa ki bor ïada ri, kiba la lah ban pynurlong ïa ka thong jong ki.
“Ka dei ka por kaba sngew sarong na ka bynta jong ngi baroh”, la ong u Myntri Rangbah-duh ka ri, u Modi haba ai ïa ki jingtip ba bniah halor ka jingtreikam ki shipai.
Ki para Myntri hapoh ka Kynhun Myntri jong u Myntri Rangbahduh ki la ai khublei ïa u halor ka jingjop jong ka ‘Operation Sindoor’ bad ki la ong ba la pyntreikam thik-pa-thik ha ki 9 tylli ki ktem lehnoh ha Pakistan bad Kashmir (ba la synshar da ka Pakistan), kynthup ïa ka jaka rieh tngen jong u khlieh ka Jaish-e-Mohammad, u Masood Azhar ha Bhawalpur.
U Modi u la batai ïa kane kum ka khyllipmat jong ka jingsarong ïa ka ri.
Hashuwa kane, u Myntri Rangbahduh u la ïakynduh ïa u Myntri ka tnad ïada ri, u Rajnath Singh bad Myntri kam Pohïing, u Amit Shah.
Hadien ba la wai ka jingïalang ka Kynhun Myntri, u Myntri Rangbahduh u la leit sha Rashtrapati Bhawan ban ai jingtip sha ka President ka ri, ka Droupadi Murmu.
