Jowai, Jymmang 07
U MLA ka Amlarem, Bah Lahkmen Rymbui ha ka 5 tarik Jymmang u la plie ïa ka ïingskul bathymmai bad paka jong ka Demthring Wah Thang Government Lower Primary School, West Jaiñtia Hills District kaba la tei ha ka jinglut kaba 43 lak tam tyngka lyngba ka State Mission Education Phase-II jong u snem 2023-2024.
Ïa ka Demthring Wah Thang Government Lower Primary School la seng naduh u snem 1973.
U Bah Lahkmen Rymbui ha ka jingkren u la ong, ka ïingskul kan ym lah ban long kumba ka long mynta lada ym ïoh ïa ka Sorkar kaba kitkhia, da kaba u ai khublei ruh ïa u Myntri Rangbah ka Jylla u Conrad K Sangma ba hapoh ka jingïalam jong ka Sorkar na kawei ka snem sha kawei, ka la pyrshang ban peit bniah na ka bynta ban kyntiew ïa ka pule puthi hapoh ka Jylla.
“Ki briew ki lah ban beiñ ban kynnoh ïa ka Sorkar hynrei kim ïohi pat ba kane ka Sorkar ka peit na ka bynta ki jingdonkam jong ka jylla la ka long ha ki skul, ki jingmyntoi jong ki khynnah skul, ka surok, ki lynti syngkieñ, ki jaka sumar bad ki liang baroh,” la ong u Ma Lahkmen.
U la pynpaw ruh ka jingsngewnguh ïa ka Sorkar Jylla halor ka jingkyntiew kyrdan ïa ka Nongtalang Government Secondary School sha ka Higher Secondary School bad ka jingsdang ïa ka laiñ pule Commerce ha Sohkha Government Higher Secondary School. U la pyntip ruh ïa ka jingthrang jingangnud jong u ban kyntiew kyrdan ïa ka RMSA kaba don ha ka shnong Shkenpyrsit bad Mustem sha ka Higher Secondary School.
U Bah Lahkmen u kyrmen ruh ba kane ka skul bathymmai kan long ka sharak sha ki khynnah kane ka skul, kane ka shnong ban ïoh ïa ka jingnang jingstad bad ka jinghikai ryngkat ka akor ka burom na ka bynta ban saiñdur ïa ka jingnang jingstad bad ka lawei ba phyrnai jong ki khynnah.
Na ka liang ki nongïalam shnong khamtam ki nonghikai bad khynnah skul ki la pynpaw ka jingsngewkmen kaba khraw ha kaba ha kane ka sngi, ki la ïoh ban rung ha ka ïing skul kaba thymmai bad kaba skhem, bad ki la ïathuh ruh ba kum ki khynnah skul bad ki nonghikai ki la mad ïa shibun ki jingeh ha ki snem ba la leit noh namar ba la rim ka skul bad hap ruh ban shong klas hapdeng ka um bad ka ktieh ha ka por slap.
Ïa ka jingïalang la pynïaid da u Chairman Bah MS Ryngkhlem bad la ïoh ka jingkren na u Bah PM Ryngkhlem bad la pynphuh-pynphieng ïa ka jingïalang da ki jingrwai jingshad na ki khynnah kane ka skul.
