Shillong, Jymmang 07
U Myntri ka Sorkar Jylla uba dei u MLA na Rongara-Siju, Rakkam A Sangma u la ong ba ki District Council ki dei ki atiar kiba khlaiñ bor bha ban ïada na ka jingshah tyllep ha ki nongwan rung be-aiñ. Haba pynpaw ka jingsngewnguh ïa ka jingstad ki longshwa ban ïasaid ban pynïoh ïa ka Khyrnit ba Hynriew, u la ong ba lyngba ki longshwa ki la wanrah ïa ka lad jingïada kaba khlaiñ da kaba pynïoh ïa ka Khyrnit ba Hynriew na ka bynta ki ‘riewlum ka Jylla.
U la ong ba ki District Council ki dei kiba peit ïa ka khyndew ka shyiap, bad ka rukom bat jaka ha kane ka Jylla kam dei ha ka Sorkar, hynrei ha ki trai shnong.
“Lada don uba pyrkhat bad mut ban pynduh syndon ïa ki District Council, uta u dei uba pynïap hi dalade ïalade. Ka Khyrnit ba Hynriew ka dei ka lad kaba ïada ïa ka khyndew jong ngi, ïa ki nongshong shnong bad bun ki jingïada ba ngi ïoh, bad lada ngi pyntreikam bha ïa ka kan dei ka atiar kaba khlaiñ bha ban ïada ïa ngi na ka jingshah tyllep ha kiba wan rung be-aiñ,” la ong u Rakkam.
Haba kylli halor ka jingkwah ka Voice of the People Party (VPP) ban wanrah noh da ka Article 371 ha ka jaka jong ka Khyrnit ba Hynriew, u Rakkam u la ong ba ym dei ban buh dak jingkylli ïa ki longshwa, “Lada ka Article 371 ka kham biang ban ïa ka Khyrnit ba Hynriew, ki la dei ban shim beit da ka Article 371 naduh kito ki por.”
Ha kaba ïadei bad ka jingsheptieng ba ka rel kan wanrah ïa ki briew ba nabar ban tyllep ha ka Jylla, u Rakkam u la ong ba ki briew ba wan rung be-aiñ kim wan da ka rel lane ka liengsuiñ, hynrei na ki thliew ki khap na khappud, khamtam ba ka Meghalaya ka dang bun ki jaka ba dang rynghang u pud u sam.
Haba ai nuksa, u Myntri u la ong, “Katkum ka khanasamari 2011, ki don kumba 11,000 ngut ki bym dei ‘riewlum (kim dei kiba rung be-aiñ) ha South Garo Hills, 8,000 ngut ha North Garo Hills, katba ha West Garo Hills ki don palat 3.5 lak ki bar Jylla (ngam tip ki dei kiba rung be-aiñ ne em). Kane ka dei tang ka rukom pyrkhat ba ka lynti rel kan plie lad ïa ki nongwan rung be-aiñ.”
