Shillong, Jymmang 07
Ka kynhun ïalehkai ka Jylla hapoh ka lama jong ka All Meghalaya Traditional Wrestling and the Pankration Association (AMTW& PA) ka la wanrah burom ïa ka Jylla da kaba khur ïa ka nam lahduh ha ka All India Traditional Wrestling & Pankration Federation Cup 2025 kaba la poi sha kaba kut ha Neelgiri Multi Purpose Indoor Sports Hall kaba ha Jaipur, Rajasthan.
Kane ka kynhun hapoh ka jingïalam ka Kong Anita Song-thiang bad u Lameshwa Majaw, ka la khur 610 point da kaba ka la ïoh 99 tylli ki takma kiba kynthup ïa 44 tylli ki takma ksiar, 30 tylli ki takma rupa bad 25 tylli ki takma rnong. Ka Haryana ka la wan ha ka kyrdan ba-ar, ka Punjab balai bad Delhi basaw.
Lah ban kdew kane ka lympung ka long ruh ha kajuh ka por kum ka jingpyrshang lane ka jingjied ïa ki nongïalehkai U-15 & Senior ban mihkhmat ïa ka ri India sha ka Asian Belt Wrestling Championship ka ban long ha Talkatora Indoor Stadium kaba ha nongbah Delhi naduh ka 21 haduh 24 tarik mynta u bnai.
Te kumta katkum ka jingïathuh da ka Kong Anita la ong ba la don ar ngut ki nongïalehkai ka Jylla kiba la shah jied. Kine ki long u Bankhraw-nam Ryndong 60 Kg (U-15) bad ka Lorenza Songthiang (Senior Women).
Lah ban pynkynmaw ba ha ka Northeast Games 2024 kaba la long ha Nagaland ka Jylla ka la khur lai tylli ki takma. Kine ki kynthup ïa u Kyrshanbor Romeo Songthiang (60 Kg) uba la khur ïa ka takma rupa, katba ka Sany Khyriem (60 Kg) bad ka Lorenza Songthiang (60 Kg) ki la khur ïa ki takma rnong.
Te kumta na ka liang ka President jong ka All Meghalaya Traditional Wrestling and Pankration Association (AMTW& PA) ka Kong Anita ka la kyntu ïa u Myntri Rangbah Conrad Sangma kumjuh ïa u Myntri ka tnat ïalehkai Bah Shakliar Warjri, ka tnat ïalehkai lem bad ïa ka MSOA ban kynthup lang ïa ka Belt Wrestling kum kawei na ki jingïalehkai ha ka Traditional 39th National Games ka ban long ha 2027 ha Meghalaya.
