Shillong, Jymmang 07
U Bah PT Sawkmie, MLA barim kum kongsan ha ka Sngi Balang ka 6 tarik u Jymmang, 2025 u la kyntiew ïa ka lama plie pyrda kum shi bynta jong ka jingrakhe dap 25 snem (Silver Jubilee) jong ka Savio Evening Secondary School, Mawlai Phudmuri.
La sdang ïa ka prokram da ka duwai ka phirat na u Phadar Jose Varickaseril ha ka jingdon ryngkat phadar Telesphorus Nonglang jong ka Mawlai Parish, kiwei ki phadar, ki nonghikai bad ki khynnah skul. Ha ka prokram kaba la pynlong ha Mawlai Parish Hall, ka principal Kong E Susngi ka la ïathuh ba la plie nyngkong ïa kane ka skul janmiet ha ka 8 tarik u Lber, 2000.
Ka thong ka long ba pynduna ïa ki khynnah kiba ieh skul shiteng por, bad kumjuh na ka bynta kiba bylla mynsngi ba kin ïoh pat ïa ka kabu ban leit skul ha ka por janmiet.
Ka la ïathuh ruh ba la seng ïa ka da u Phadar Gervasis ryngkat ka jingïarap lang jong u (L) John Durong.
Katba na ka liang u Bah Sawkmie u la kyntu ïa ki khynnah pule ba kim dei ban don ïa ka jingsngewpoh ne jingsngew shah ieh beiñ namar baroh ki ïa ryngkat kyrdan hakhmat U Blei.
U pynpaw ruh ba ha ka jingim kam don ka ‘short cut’ ne ka lynti balyngkot, hynrei ban long ki nongjop ha ka jingim hap ban kiew na uwei u mawkyndon sha uwei pat.
U la ban jur ïa ki khynnah ba kin long barabor kiba trei shitom ban ïoh kheit ïa u soh uba thiang ha ka jingim ka jong ki.
Ka Savio Evening Secondary School ka la pynpaw ba kam lah ban klet ïa ki jingnoh synñiang jong u Bah PT Sawkmie ha ka por ba u long kum u MLA bad Myntri Sorkar, kumta haba ïadei bad kane, ka la ai khublei bad pynpaw ïa ka jingsngewnguh na ka bynta jong u.
