Shillong, Jymmang 07
Ka lympung ïalehkai 4th Eastern West Khasi Hills District Level Inter-School Athletic Meet 2025 ba la pynïaid da ka shlem treikam District Sports Officer (DSO), West Khasi Hills District ka la sdang ha ka sngi Balang ha madan K.S.A kaba ha Mairang.
Ha kane ka lympung ka ban neh lai sngi kynthih, la wan shim bynta da 770 ngut ki khynnah shynrang bad kynthei na 24 tylli ki skul na kane ka district. Kine ki kynthup ïa 382 ngut ki shynrang bad 388 ki kynthei.
Ïa kane ka lympung la plie da u MDC ka Mairang Nongkhlaw constituency, Bah Equator L. Nongrang kum kongsan ha ryngkat ka jingdon lang u Bah J.Thyrniang, Sub-Divisional Schools Education Officer ka EWKHD, Mairang kum symbud kongsan, ka DSO Kong Balarina Syiem, Principal ka Khadsawphra College, Sordar Pyndengumïong, President ka District Sports Association, Mai-rang bad kiwei kiwei.
Ïa kane ka lympung la phiah sha lai tylli ki kyrdan ïalehkai; ka Under-14, Under-16 bad Under-18. Katba ki jingïalehkai ki kynthup ïa ki jingïakop mareh bapher bapher, nangta ka High Jump, Long jump, Javelin Throw, Shot Put, Back Throw, Discuss Throw bad kiwei kiwei. La shim ïa ka jingbam smai da u Joiynistar Nongbah na ka Little Stars English Medium Secondary School na ka bynta baroh ki nongshim bynta.
