Khliehriat, Jymmang 07
U Myntri ka tnat Tourism ka Sorkar Jylla, Bah Paul Lyngdoh ha ka Sngi Ba-ar u la plie ïa ka madan Futsal ha San Shnong Secondary School, Mukha -ïalong kaba hap hapoh ka Wapung C&RD Block lyngba ka jingkyrshan ka District Mineral Foun-dation (DMF).
U Bah Paul Lyngdoh ha ka jingkren u la pynpaw ïa ki jingshim khia ka Sorkar ban wanrah ïa ki projek pynroi bapher bapher ha kylleng ki bynta jong ka Jylla kynthup ïa ki kam ïalehkai, ki kam jngohkai pyrthei bad kiwei kiwei.
Te kumta u la pynshlur ruh ïa ki samla ka district ban ïashim bynta da ka jingsngewtynnad ha ki kam ïalehkai bad u la ïaroh ïa u Myntri Rangbah ka Jylla na ka bynta ka jingthmu ban kyntiew ïa ka Jylla kum ka nongbah phutbol jong ka ri India nalor ka jingai burom ïa ka kum ka nongbah jong ka rwai ka tem jong ka Ri.
U la pyntip ruh halor ki jingthmu bapher bapher ba la shim da ka Sorkar ban kyntiew ïa ki kam ïalehkai ha ka jylla kynthup ka jingtei ïa ki jaka ïalehkai bad ka jingkyrshan pisa sha ki klob ïalehkai phutbol.
Nalor kata, u Bah Lyngdoh u la pynbna ruh ba la mynjur ïa ka song pisa na ka bynta ban kyntiew ïa ki jaka jngohkai pyrthei ha East Jaiñtia Hills District kiba kynthup ïa ka jingpynbha ïa ka Umbyrlein Falls ha ka jinglut kaba T.5.79 klur, ka kshaid Rynji Falls ha ka dor T. 9.64 klur, ka wah Moopun ha ka dor T. 6.44 klur bad wah Sahksaw ha ka dor T. 8.38 klur tyngka.
Katba na ka liang u Myntri Sorkar bad MLA ka Khliehriat, Bah Kyr-men Shylla u la ïaroh ïa ki sien jam jong ka San Shnong Welfare Associa-tion ha kaba kyntiew ïa ka kam jngohkai pyrthei ha katei ka thaiñ bad u la ban jur ïa ka jingdonkam jong ka jingïatreilang haba wanrah ïa ki kam pynroi bapher bapher hapoh ka District.
U Bah Shylla u la pynsngew ruh ïa ki jingthmu bapher bapher ba la shim lyngba ka District Mineral Foundation (DMF) Trust ha katto-katne ki bynta jong ka roi ka par kynthup ka jingtei ïa ki jaka ïalehkai kum ki madan Futsal bad kiwei kiwei.
Kiwei kiba la ai jingkren ki kynthup ïa u MLA ka Ranikor, Bah Pius Marweiñ, Deputy CEM ka JHADC Bah Lasky Rymbai bad Block Development Officer Wapung C&RD Block, East Jaiñtia Hills District, u Dr T. Shylla.
La pynphuh-pynphieng shuh shuh ïa kane ka jingïalang da ki jingrwai jingshad ba la shim bynta da ki khynnah skul bad ki dkhot SHG ka thaiñ Mookhaïalong.
