Jowai, Jymmang 07
Ka Shillong Cricket Association ‘B’ ka la rah ïa ka nam lahduh ha ka MCA U-16 Boys’ Inter-District Tournament 2025 ba la pynïaid da ka Meghalaya Cricket Association, hadien ba ka la pynliem noh ïa ka Tura District Cricket Association (TDCA) da 8 wiket ha ka sngi Balang ha madan Thad, Mukhla Mission.
Ha kane ka jingïakhun phainal, ka TDCA ka la kam trai ban tied nyngkong ha kaba ka la ïoh 106 run bad shah pynhap 10 wiket ha ki 41.4 over. U Aniket Poddar (not out) marwei ula tied 31 run na ki 44 bol ryngkat 5 tylli ki ‘four’, kumjuh u Doangkam Ch Marak u la ïoh 25 run na ki 23 bol ryngkat kawei ka ‘six’ bad 3 tylli ki ‘four’. Katba kapten ka SCA u Arav Baraily u la shim 3 wiket ha ki 9.4 over.
Haba wan shimti ïa ka pali kaba ar, ka SCA ‘B’ ka la lah ban kynjoh sha ka thong da kaba ka la ïoh 109 run ha ki 22.2 over. U Suraj Chettri (not out) u la tied 71 run na ki 79 bol ryngkat kawei ka ‘six’ bad 10 tylli ki ‘four’. Katba u Aniket Poddar u la shim 2 wiket ha ki 8 over na ka bynta ka TDCA.
Ïa ka khusnam Player of the Match bad Best Batsman la ïoh da Suraj Chettri jong ka SCA ‘B’ uba la tied 368 run. Katba ïa ka nam Best Bowler bad Player of the Tournament la ïoh da u Aniket Poddar jong ka TDCA.
Ïa kane ka lympung ïalehkai la wan ban pynhap pyrda da u MLA ka Jowai u Bah Wailadmiki Shylla ha ka jingdonlang u Assistant Director ka tnat ïalehkai ka Sorkar Jylla u Bah Khroobok Passah, u President ka West Jaiñtia Hills District Cricket Association (WJHDCA) Bah Edystone Shylla, u Secretary ka Meghalaya Cricket Association (MCA) Bah Rayonald Kharkamni, nalor ki dkhot nongkitkam ka WJHDCA bad MCA nalor kiwei kiwei.
Lah ban kdew ba ïa kane ka lympung la sdang naduh ka 15 tarik u Ïaïong, ha kaba la phiah ha ki ar bynta kata ha Jowai bad ha Mendipathar. Ïa ki jingïalehkai semi-final la pynlong ha ka lah sngu U Blei, ha kaba ka Tura DCA ka la pynliem noh ïa ka Ri-Bhoi DCA da 20 ron ha Mendipathar, katba ka SCA-B ka la pynliem ïa ka East Khasi Hills CA da 9 wiket ha Jowai.
Na ka liang u Bah Rayonald u la pynpaw ïa ka jingkhmih lynti ba lyngba kane ka lympung kaba la pynlong ha Jaiñtia Hills kan long ka jingïarap kaba khraw na ka bynta ki samla jong kane ka thaiñ ba kin nangkiew shaphrang ha ka jingïalehkai kriket.
