Ka jinglong jingman hapdeng ka India bad Pakistan kam don satia ha ka jingbiang khamtam lei hadien ka jingthombor jong ki lehnoh ha Pahalgam, Jammu bad Kashmir ha kaba 28 tylli ki mynsiem briew ki la duh ei. Kane ka jingjia, ka la pynkyndit ym tang ïa ka India hynrei ïa kiba bun ki ri ka pyrthei. Kum ka jubab halor kane ka jingshah thombor ha ki lehnoh, ka jingkynnoh ka la leit beit sha ka Pakistan ba dei ma ka kaba ailad bad pynshlur ïa ki lehnoh. Nalor kane, ka India ka la dep ruh ban ai ka jubab kaba tyngeh halor kane, da kaba ka la dep ban khyrwit ïa ki ïingsah jong ki lehnoh bad ruh ïa ki khyndai tylli ki jaka ba ju treikam bha ki lehnoh ne kita ki ktem lehnoh.
Nalor kane, la ïohi ba ka Sorkar India lyngba ka Home Ministry, ka la pynlong ruh ïa ka ‘Mock Drill’ kum shi bynta ban ai jinghikai sha ki briew ka aiñ bad ruh ïa ki paidbah ba kin long kiba pynkhreh bad kumno ban shim ïa ki lad jingïada lada wan jia ka thma. Ha kane ka jingleh mock drill, la pynlong ka jingpynlip light kaba ar minit bad ruh ka jingpynpah siren kum ka dak ban pyntip sha ki paidbah. Ngin hap ban sngewthuh pat ba haduh katno kane ka jingpynlong ‘mock drill’ kan ïarap bad haduh katno ki paidbah kin sngewthuh. Kaba shu pynlong bad lada ka wan jia shisha, kan ïapher bak-ly-bak. Ka bynta ba kongsan ka dei eh ha ki paidbah ban sngewthuh bad bud ryntih ïa kiei ki jingbthah ba la wanrah da ka Sorkar.
Ngi ïohi ba halor kane ka jingbym don ka jinglong kaba biang hapdeng ka India bad Pakistan, ka Sorkar Meghalaya ruh ka la ïasnohkti lang. Nalor kane, la ïohi ba ka la khih khohreh biang ha kaba ïadei bad ka jingker sainar ha shilynter jong ka khappud bad ka Bangladesh. Dang ha ka sngi Ba-ar, ka Sorkar Jylla ka la bthah ïa ki Deputy Commissioner jong ka rilum Khasi bad Jaiñtia ba kin ïakren pynbeit noh kham kloi bad ki trai khyndew khnang ban ïoh shna pyndep ïa ka jingker sainar ha shilynter ka khappud Indo-Bangladesh. Ïa kane ka rai la shim ha ka jingïalang ba la pynïaid da u Symbud Myntri Rangbah uba khmih ïa ka tnat Kam Pohïing Bah Prestone Tynsong ha ryngkat ka jingdon lang jong u Inspector General ka tnat shipai BSF Meghalaya Frontier bad ki ophisar na ka NBCC.
Kiba bun ki bynta jong ka khappud hapdeng ka Meghalaya bad Bangladesh ki long kiba laitlan bad kiba suk na ka bynta ki briew ban jam na shiliang sha shiliang. Ïa kane, ngi lah ban sakhi lyngba ka jingrung tuh jong ki nong Bangladesh na ka por sha ka por bad kumjuh ka jingjur ki kam khaïi tuh ba hiar na India sha Bangladesh. Jan manla ka sngi, ngi ïohi ba ki shipai BSF ki kem ïa ki briew bad kurup ïa ki mar ki mata, ka jingkem jong ki seng ruh kumjuh ha ki shnong ki thaw ïa ki khar Bangla. Ka Sorkar ka la ong ba ka daw jong ka jingslem ka dei ban ïoh jaka, kumba 33-34 kilometer ka khappud ha West Jaiñtia Hills ym pat lah ban ker sainar bad kumba 7-8 kilometer ka jingker sainar ka dang sahteng ha East Khasi Hills district. Kawei pat ka jingeh, ka dei ba ka jingker sainar ka dei ban long hapoh ka 150 yard ka jingjngai na u mawpud. Lada ïaid katkum kane ka kyndon, kin don bun ki shnong ki ban hap shabar jong ka jingker sainar. Kane ka mat ka dei ruh kaba la pynkhih pynksar bha.
Ban ïaid beit shakhmat ka kam bad ban lah ban ker lut, ka long shisha ka kam kaba donkam. Kum ki nongshong shnong ruh ngi donkam ban ai ka jingïatreilang. Ym pat ba ngin duh ïa la ki jong ki jaka puta ne ka khyndew ka shyiap. Kumta donkam ban ïasngewthuh jingmut lang na baroh ki liang ba kiei kiei jingthmu baroh kin long kiba seisoh bad kumjuh ruh ban long pat ka jingshngaiñ ïa ka pateng ban wan.
