New Delhi, Jymmang 07 (UNI)
Ki shipai India ki la sdang ïa ka ‘Operation Sindoor’ da kaba ther namding ïa ki jingtei jong ki lehnoh ha Pakistan bad Jammu & Kashmir (ba la synshar da ka Pakistan) ha kaba la saiñdur bad bthah ïa ki kam thombor lehnoh pyrshah ïa ka India, ong ka kyrwoh ka tnad ïada ri ha ka miet Sngi Ba-ar.
Haba kdew ba baroh ki don khyndai tylli ki jaka kiba la pynithuh, ka tnad ka la ong “Ki jingthmu jong ngi ki long kiba la pynleit jingmut, kiba la shim jingkheiñ bad ki bym pynjur ïa ka jinglong-jingman. Ym shym la thmu ïa kino-kino ki jaka shipai ka Pakistan. Ka India ka la pyni ïa ka jingïaishah kaba jur ha ka ban jied ïa ki jaka bad ka rukom ban ïaid shakhmat bad ka kam.”
Kine ki sienjam ki wan hadien ka jingshah thombor ba shyrkhei ha Pahalgam ha kaba 25 ngut ki nong India bad uwei u ‘Nepali’ ki la shah pynïap.
“Ngi bat la ka kular ba kito kiba donkti ha kane ka jingthombor kin shah pynngat ha ka jingkitkhlieh,” la ong ka kyrwoh..
Kitei khyndai tylli ki jaka ne ktem lehnoh kiba ka India ka la ther ha Pakistan bad Jammu & Kashmir (ba la synshar da ka Pakistan) ki kynthup ruh ïa jong ka ‘Jaish-e-Mohammed’ bad ‘Lashkar-e-Taiba’.
Kine ki kynthup ïa ka Markaz Subhan Allah ha Bahawalpur; Markaz Taiba ha Muridke, Sarjal/Tehra Kalan, Mehmoona Joya Facility ha Sialkot, Markaz Ahle Hadith Barnala ha Bhimber, Markaz Abbas ha Kotli, Maskar Raheel Shahid ha Kotli District, Shawai Nallah Cam ha Muzaffarabad bad Markaz Syedna Bilal.
Katei ka jingther namding ba thik-pa-thik ka la jia ha ka por 1:44 baje mynstep.
Katkum ki khubor, u Myntri Rangbahduh ka ri, u Narendra Modi, u la peitngor bad buddien haba ïadei bad ka jingïaid shakhmat jong kane ka kam.
Napdeng ki ktem kiba la shah ther namding, ka Markaz Subhan Allah ha Bahawalpur la tip kum ka jaka treikam jong ka Jaish-e-Mohammed.
Ka Markaz Taiba ha Muridke ka ïasoh bad ka Lashkar-e-Taiba bad la tip ba ka long ka jingtei kaba la tei skhem bha.
Ha kajuh ka por, ka Markaz Abbas kaba don ha Kotli ka don ka jingïadei bad ka JeM, katba ka Mehmoona Joya ha Sialkot, ka don jingïadei bad ka Hizbul Mujahideen.
Ha kane ka jingjia, 10 ngut ki bahaïing jong u khlieh nongïalam ka Jaish-e-Mohammad, u Masood Azhar lem bad 4 ngut kiwei pat kiba ïajan bha bad u, ki la khlad noh ha Bahawalpur Subhanallah Complex jong ka Pakistan kaba la pyndonkam da kane ka seng lehnoh kum ka jaka rieh tngen.
Kum ban shu kdew biang, ka India ka la ther namding ïa 9 tylli ki ktem lehnoh, kiba don jingïadei bad ka Jaish, Lashkar-e-Taiba bad Hizbul Mujahideen, ha Pakistan bad ha Kashmir (ba synshar ka Pakistan). Ki jingshah ther namding ka Subhan Allah Complex ha Bahawalpur ki long kawei na ki ar tylli ki jingshah ther ba kongsan kum shi bynta jong ka ‘Operation Sindoor’.
Ka India ka la ther namding ïa ki khyndai tylli ki jaka rieh tngen jong ki Lashker-e-Taiba bad Jaish ha Pakistan bad ka ‘Pakistan Occupied Kashmir’ (PoK) ha kaba palat 80 ngut ki lehnoh ki la ïap.
