Shillong, Jymmang 07
U Bah Banshai Marbaniang uba dei u nongtrei mon sngewbha napoh ka Jylla bad kum uwei na ki nongshong shnong ka Mawsynram uba la don bynta ha ka ban ïakhun dawa kyntiew kyrdan ïa ka Mawsynram C&RD Block sha ka Civil Sub-Division, u la ong ba ka jingleh politik bad ka jingshim kabu jong u MDC ka Mawsynram, Bah Alvin Sawkmie ban kam ba dei tang ma u uba la trei shitom ban dawa kyntiew kyrdan noh ïa ka Mawsynram sha ka Civil Sub Division ka la pynlong ïa ki katto-katne ngut kiba la ïakhun baroh shikatta ban dawa Civil Sub Division ïa ka Mawsynram ba kin dap da ka jingsngewsih.
U Bah Banshai u la ong ba ha ki snem ba la leit noh kata ha ka 5 tarik u Naitung 2018, ma u ha ryngkat da ka jingïatreilang bad ka HYC Mawsynram hapoh ka jingïalam u Bah Morgan Lyngdoh bad u Bah Scanly Marbaniang ki la mih shakhmat ban pynlong da ka jingshong kyllaiñ mongor bad ban shah thngan hakhmat u Mot dur Kiang Nongbah uba don mar pyrshah bad ka Shillong Civil Hospital na ka bynta ban dawa ba dei ban kyntiew kyrdan noh ïa ka Mawsynram C&RD Block sha ka Civil Sub Division. U la ong ruh ba ha kitei ki por ki khlem ïohi syrngiew satia ïa u Bah Alvin Sawkmie ba un mih shakhmat ne ban pynpaw eiei ka jingkyrshan halor kane ka jingdawa da kaba bynrap ba utei u MDC um ju wan mih satia shapoh ka konstitwensi hynrei u la wan tang ha ka por ka jingïalap ilekshon bad ban siew ïa ki briew da ka pisa.
“Khlem da ap slem ter-ter naduh kitei ki sngi kumba shi taïew kynthih ngi la pynbud shuh-shuh da ka jingshong shah thngan kumba ngi ïeng ban dawa ban kyntiew kyrdan ïa ka Mawsynram Block sha ka kyrdan Civil Sub-Division kaba long katkum ka hok bad jingshisha jong ki paidbah jong ka thaiñ. Haba ngi kren halor kane ka mat, na ka liang jong ki arngut kata u MLA, u Bah HM Shangpliang bad u MDC, u Bah Alvin Sawkmie, ha u snem 2018 ter-ter nalor ba kim ïohsngew ïa ka jingdawa jong ki paidbah bad shano ki jah nalor ba kim kwah hi ruh ban shimti ïa ka kam ne wat ban wan peit ne jngoh ïa ngi ha katei ka por kum kita ki briew kiba la shimti ban long ki nongtrei mon sngewbha napoh ka Mawsynram Constituency kumba ngi la ïeng ban aiti ïa la ka jong ka jingim”, ong u Bah Banshai.
U Bah Banshai u la ong ba wat hadien ka jingshah rem noh jong u Bah Pynshngaiñ N Syiem bad u Bah HM Shangpliang kum ki MLA ka thaiñ bad ba la long MLA noh da u Bah Olan Sing Suiñ, la sakhi ba une u MLA bathymmai ka konstitwensi ruh u dang ïai sngap mynthi hi kumba long lem kitei ki MLA barim.
Shuh-shuh, u Bah Banshai u la ong ba wat haduh kine ki sngi ruh kim ju ïohi satia ïa u MDC ka Mawsynram ba un kren eiei ban ïarap ïa ki nongtrei mon sngewbha kiba mih napoh ka Mawsynram Constituency ban dawa halor kane bad ong ba kane ka jingleh u MDC ka dei tang ka jingshim kabu jong u namar lada ka Mawsynram C&RD Block ka shah kyntiew kyrdan sha ka Civil Sub Division, un dei tang utei u MDC marwei shimet uba lah ban thungkam-thungjam ïa ki briew jong u hynrei kiba bun ki paidbah kin ïakynduh jingeh kaba khraw.
