Jowai, Jymmang 07
Katba ka jingïakhih kaba khlem buh por pyrshah ïa ki karkhana ban dawa pynkiew ïa ka dor bai kit ïa u Coke na ka T.1400 shi ton sha ka T.2500 shi ton ka dang bteng, hynrei ha ka por mynsngi jong ka 7 tarik Jymmang kawei ka trok kit Coke ryngkat ka jingsynran ka kali pulit ka la ïaid pyni bor ha surok bah ha Hynñiew Mer jaka ba la pynlong ïa ka jingïakhih.
Ïa kane ka jingïakhih la khot pynlong da ka seng ki trai bad nongñiah trok ka Meghalaya Commercial Truck Owner and Drivers Association (MCTODA) Jaiñtia Hills Unit kaba la sdang ha ka 6 tarik Jymmang ha surok bah Hynñiew Mer, West Jaiñtia Hills District.
Katkum ka jingïathuh ki nongïakhih ha katei ka jaka, la ong ba katei ka trok dei kaba don ïa u registration number ML04-D-3267 kaba dei trai da uwei u rangbah uba ju long teng kum u nongïalam barim jong ki trai trok.
U nongai buit ka seng u Ma Smen Khyndait kumjuh u Secretary Ma Shanborlang Suchiang bad President ka Jaiñtia Hills Truck Owner’s Association (JHTOA) Ma Biangshwa Shylla ki la pynrem jur halor ka jingdonkti jong ki pulit ban synran ïa katei ka trok ba kit Coke wat haba ka jingïakhih ka dang ïaid na ka bynta ban ïoh kamai lang bad ban ïa im ja lang para nongñiah trok bad trai trok, ym ban ïakhih tang ban myntoi uwei ne ar.
Kitei ki nongïalam ki la kynnoh ba katei ka trok kit Coke kaba synran da ki pulit ka la thom beit ban ïaid shakhmat wat haba da ki spah ngut ki nongïakhih ki don ha surok ban dawa ïa ka bai kit bai bah na ki karkhana.
