New Delhi, Jymmang:
Ka India ha ka Sngi Balang ka la pynbna ba ka la leit ban ther bom sha Pakistan, hadien ar taiew ba ki lehnoh ka Pakistan ki la thombor ia ka India ha kaba 25 ngut ki nong India ki la duh ei ia la ka jingim ha katei ka por.
Ka sorkar India ha katei ka step ka la pyntip ba ki shipai jong ka, ki la leit ban hiar thma ïa ki khyndai tylli ki bynta jong ka Pakistan ha ki thaiñ jong ka liang ka Kashmir, ba don ka jingïakynad. Ki heh shipai jong ka Pakistan, ki iathuh ba ym duna ia 8 ngut ki briew ki la khlad ha katei ka jingjia bad kumba 35 ngut kiwei pat, ki la mynsaw, hadien ka jingleit ther ‘namding ka India sha 6 tylli ki jaka kiba don ha ki bynta jong ka Punjab Province bad ha Kashmir.
La iathuh ruh ba 2 tylli ki liengsuiñ thma ka Pakistan ki la shah siat pynhap noh ha India, ha ka liang jong ka Kashmir, kaba hap hapoh ka jingkhmih bad jing synshar jong ka India. Hynrei na ka liang jong ka Pakistan ruh ka la pyntip ba ka la ioh ban siat pynjulor ïa ki liengsuiñ jong ka India, kynthup ïa ki katto katne ki liengsuiñ ïapom ba thymmai tam jongka.
Katba ka India ha kine ki snem ba la dep ka la ju leit thombor sha Kashmir, sha ka bynta kaba hap hapoh ka jingsynshar jong ka Pakistan bad ki jaka ba marjan badka ha ki por ba dang ïaid ki jing-iakynad, ka jinghiar thma ha ka Sngi Balang ïa ka Punjab, ha ka jaka jong ka Pakistan shabar jong ka thaiñ ba ïakhun, ka pyni ïa ka jingjur jong ka jingïakynad hapdeng kine ki ar tylli ki ri kiba don ïa ki tiar nuclear.
Hadien ki jingshah thombor, ka India ka la pynkhreh ban ioh ia ka jingkynthoh na ka Pakistan, kaba long ka para marjan bad ka nongshun ruh jong ka India la palat hynñiew phew snem bad la ong ba katba ki jingïakynad ki la nang jur biang, ki nongïalam jong ka pyrthei ki la maham ïa ki jingma kiba lah ban mih lada ki arliang mamla kim lah ban pynjem ïa ka jingïakynad.
Ka India ha ka Sngi Balang, ka la ong ba ka la rai ban ai jingsneng ia ka Pakistan hadien ba ka la ioh lum ïa ki sakhi kiba pyni shai ia ka jingdonkti jong ki lehnoh ka Pakistan ha katei ka kam thombor ha India.
Katba na ka liang jong ka Pakistan pat, ha katei ka Sngi Balang hi ka la ong ba katei ka jingleit hiar thma jong ka India ka long kaba khlem nongrim bad kaba khlem daw bad ba kane ka jingleh jong ka India ka la pynkheiñ ia ki aiñ synshar jong ka Pakistan.
Kumjuh ka Pakistan ka la ong ba kan sa ai da ka jubab kaba tyngeh ia ka India bad kan pynhiar kput ruh namar ka jingbym banse ba ka India hi ka la pan kwah.
