Shillong, Jymmang 08
Wat la ka jingpynitynnad ïa ka Ïewduh bad ka jingpynbha ïa ki lynti ïaid kjat ka la ïaid shakhmat hynrei haba peit pat najrong kata sha ki bynta ba halor jong ki dukan, la dap da ki jaboh jabaiñ ba la bret pathar bad ruh ka jingpur jong ki ñiut kiba khlem pynkhuid satia.
Ïa kane ka jingdap da ki jaboh jabaiñ halor ka slep jong ki dukan, la lap hadien ba u Myntri ka Hima Mylliem ba khmih ïa ka khuid ka suba u Myntri War Tynghah, ha ka sngi Palei u la leit ban jurip ïa ka ïew bad ruh ïa ki bynta ba shajrong jong ki dukan kiba don ha Ïewduh.
Wat la ka jingitynnad jong ka Ïewduh ka la sdang ban paw khamtam ha ka bynta ba shakhmat na Motphran hynrei kane ka jingdap ki jaboh jabaiñ ha ki tnum bad slep jong ki dukan, ka pynsniew dur biang ïa ka Ïewduh khamtam lei haba peit najrong.
Ha kaba ïadei bad kane, u Myntri haba ai jingkren u la hukum ïa baroh kiba dei trai ïa ki dukan ha Ïewduh la ki dei ki Khasi ne ki bym dei Khasi ruh ba ki dei ban pynkhuid noh ïa ki jaboh jabaiñ ïa kiba la bret pathar ha jrong slep bad ba dei ban pynkhuid noh mardor, bad yn ai por ïa ki hapoh ka shi bnai bad lada kim lah ban pynkhuid, ka ophis u Syiem ka Hima Mylliem kan leh da kaba tyngeh.
U la ong ruh ba kane ka jingjaboh hajrong jong ki dukan ka long kaba isaitmet shi katdei eh khamtam lei haba jaw ka um na ki slep halor jong ki paidbah kiba wan siew wan tda hapoh ïew khamtam lei ha ka por slap. Kane ka ktah ruh ïa ka koit ka khiah ym tang jong ki nongwan ïew wan hat, hynrei khamtam lei jong kito kiba shong die jingdie hakhmat ki dukan hapoh ïew.
Shuh shuh u la ong ruh ba mynta ka Ïewduh ka la khuid la suba haba ïadei bad ki lynti ïaid kjat namar ki dang maramot da ki maw Sohra, namar kata ka donkam sa ka slep jong ki dukan ba kan long kaba khuid.
U la kyntu ruh ïa kiba trei kontrak ïa ki dukan ha ïew ba kin da lum bha bad pynkhuid bha ïa ki tiar ki tar ynda la dep ban pyntrei ïa ki dukan bad lada lap ïa kiba pynkheiñ ne ïaleh pyrshah yn pynshitom katkum ki kyndon aiñ.
