Jowai, Jymmang 08
Ka lympung ïalehkai District Cricket League ba la pynïaid da West Jaiñtia Hills District Cricket Association (WJHDCA) ka la nangjam shaphrang ha kaba ka Evergreen Mukhla Mission ka la pynliem ïa ka Moodymmai da 11 run ha ka sngi Palei.
Ha kane ka jingïakhun, ka Moodymmai SC kaba la jop kynting pisa, ka la ailad shwa ïa ka Evergreen Mukhla Mission ban tied nyngkong ha kaba ka la ïoh 130 run na ki 20 over bad shah pynhap 9 wiket. U Shoristar Suna u la tied 58 run na ki 51 bol kynthup ïa kawei ka ‘six’ bad hynñiew tylli ki ‘four’. Katba u Bichar Lamare nongkawang bol ka Moodymmai u la shim 4 wiket lem bad u Rijest Lytan uba la ïoh 3 wiket.
Na ka daw jong ka jingpynthut u slap, ïa ka thong la hap ban pynduna noh sha ka 116 run na ki 17.2 over da kaba pyndonkam da ka DLS Method. Te kumta ka Moodymmai SC ha ka pali ban wan beh ïa ka thong, ki nongtied jong ka kim shym la lah ban kynjoh sha ka thong ha kaba ka la ïoh tang 104 run ha ki 17.2 over bad shah pynhap 8 wiket. U Levestar Phawa u la tied 32 run na ki 24 bol kynthup ïa kawei ka ‘six’ bad saw tylli ki ‘four’, kumjuh u Pyndap Lamin u la ïoh 17 run na ki 13 bol kynthup ïa saw tylli ki ‘four’. Katba u Kamkini Sari nongkawang bol ka Evergreen Mukhla Mission u la shim 3 wiket bad ban ïohpdiang ruh ïa ka nam ‘Man of the Match’.
Ka jingïalehkai ha ka sngi Thohdieng kan long hapdeng ka Mupliang SC pyrshah ïa ka North East A.U. (ATS) ha ka por 8.30 mynstep.
