Shillong, Jymmang 08
Kum shi bynta ban tehlakam bad pyrkhing ïa ka rung ka mih jong ki briew kynthup ruh ki nongkhaïi tuh bad ki dkhot jong ki seng kieng atiar, ka Sorkar Meghalaya ka la pynjari da ka korphiw miet katkum ka kyndon 163 BNSS ha ki jaka khappud ka Jylla bad ka Bangladesh.
Lah ban kdew ba kane ka jingpynjari ïa ka korphiw miet ka la wan ruh ha ka por ba ka la don ka jingkyan jong ka thma hapdeng ka India bad Pakistan-hadien ba ka India ka la ther namding ïa ki ktem jong ki lehnoh Laskar e-Taiba bad Jaish-2-Mohammed ha Pakistan bad Pakistan-occupied Kashmir (PoK) ban kput ïa ka jingthombor ha Pahalgam, kaba la shim ïa ka mynsiem jong 28 ngut ki nongshang kai pyrthei.
Katkum ka hukum ba la pynmih da u Deputy Commissioner ka West Jaiñtia Hills, kane ka korphiw miet kan treikam mardor naduh ka por 8 baje mynmiet haduh 6 baje mynstep ha ki jaka ba haduh 200 meter na u Zero Line.
Ha East Khasi Hills, kane ka korphiw kan treikam naduh ka por 8 baje mynmiet haduh 6 baje mynstep ha ki jaka ba hapoh ka 1 Km radius na u zero line bad kan treikam haduh 2 bnai kynthih.
Kumjuh, ka jingpyntreikam ïa ka korphiw miet kan treikam ruh ha khappud kaba ha East Jaiñtia Hills, ha kaba u DC lyngba ka hukum bad ka bor, u la pynbna ïa ka korphiw miet ka ban sdang naduh ka por 8 baje mynmiet haduh 6 baje mynstep bad kan treikam haduh 500 meter na u Zero Line.
Na ka liang ki DC ka WJH, EJH bad EKH ki la ong ba ki jaka khappud ka WJH bad EJH namar ba bun ki dei ki bym pat ker sainar, ka dei kaba suk bha ban rung tuh da ki briew na Bangladesh, ki dkhot jong ki runar kiba don jingïadei bad ki riew kiengatiar bad ki kynhun lehnoh, kiba lah ban ïalum bun briew hajan ki jaka khappud ha ka por mynmiet ban leh ïa ki kam bymman.
Katkum kine ki hukum, la khang pyrshah ïa ka jingïaid ki briew ha ki jaka khappud bad ka Bangladesh da ka jingthmu ban jam sha shiliang u pud ne rung tuh sha Ri India.
La khang pyrshah ruh ban ïalum briew ba 5 ngut ne palat bad ban rah ïa ki tiar pynmynsaw kiba lah ban pyndonkam kum ki tiar ïaleh ba kynthup ïa ki dieng, ki maw ha ki jaka khappud ka India-Bangladesh.
La khang pyrshah ruh ïa kino-kino ki kam beaiñ, ka jingkhaïi tuh ïa ki masi, ki mar ki mata, khaïi kwai, tympew, ‘kharang, biri, duma bad kiwei kiwei.
