Shillong, Jymmang 08
Ka Khasi Students’ Union (KSU) ha ka sngi Palei ka la dawa na ka Sorkar Jylla bad ka tnat Pule-Puthi ba kan shim khia bad leh eiei mardor halor ka rukom pynngat jaka thoh eksam (examination centre) ïa ki samla pule ki ban ïakhun ïa ka eksam Central University Entrance Test – Undergraduate (CUET-UG).
Ha ka kyrwoh ba la pyllait da u Education Secretary ka KSU u samla Pynkmenlang Sanmiet u la ong, bun bah ki samla pule na Jylla ki la shah pynngat thoh eksam shabar ka jylla Meghalaya kum sha Aizawl, Dibrugarh, Dispur bad kiwei kiwei. Kane ka jingpynngat ba bakla ka la kylla long ka kam ba jia na ka por sha ka por namar kum kine ki juh ki jingjia ki la jia ha ki snem ba la leit noh.
Ka KSU ka sngewkhia jur ba ka National Testing Agency (NTA) ka dang ïai bteng ban phah thoh eksam ïa ki samla pule sha ki jaka (centre) ba sha jngai, kaba wanrah ïa ka jingeh bad ka jingsyllang ïa ki samla pule jong ka jylla.
U la ong ba ka seng ka la dep kren teng ïa kane ka kam lyngba ki shithi bad ki jingkren paidbah ha kine ki snem ba la leit noh. Dang shen, ka KSU ka la ai ïa ka shithi sha u Myntri ka tnat Pule-Puthi ha ka 19 tarik Lber, 2025, bad kyrpad ban shim khia mardor ïa kane ka jingeh.
“Wat hapdeng kine ki jingpyrshang, ka NTA sa shisien kam shym la lah ban pynbeit ïa kane ka kam, kaba pyni ïa ka jingbteng ban ym suitñiew ïa ki jingeh ba la mad da ki samla pule ha Meghalaya,” u la ong bad bynrap ba “Kane ka rukom leh ym tang ka buh ha ka jingeh ïa ki samla pule bad ki kmie ki kpa ha ka liang ka leit ka wan, ka jaka sah bad ka pisa tyngka hynrei ka buh ha ka jingma ruh ban pynkynran dien noh ïa ki na ka jingïakhun ïa ka eksam CUET-UG. Ka seng ka kheiñ ïa kane ka jingbym shim khia kaba ju jia man ka por da ka NTA kum ka jingkhanglad kaba khraw ïa ka jingïoh lad bad kumjuh na ka bynta ki samla pule na ka jylla,” u la ong.
“Kumta, ka KSU lyngba kane ka khubor, ka dawa jur na ka Sorkar Meghalaya ban leh eiei mardor ha ka ban pynbeit ïa kane ka kam bad ki bor ba dei khmih na ka Sorkar Pdeng. Ïa ka hok bad ka bha ka miat jong ki samla pule dei ban ai jingïada, bad ban pynbeit bha, dei ban leh ha kata ka rukom ka ban pynthikna ba kin lah ban ïakhun ïa ka eksam CUET-UG khlem ka jingkulmar jingmut, jingpynthut ne ka jingpynkit ba khia,” la ong ka kyrwoh.
