Guwahati, Jymmang:
U MP jong ka seng Congress, u Gaurav Gogoi, u la pynrem ïa ki jingkren ba dang shen jong u Myntri Rangbah ka Assam, u Himanta Biswa Sarma, ha kaba ïadei bad ki kynthei bad ka jingthung kam ha ka por ba dang synshar ka Congress bad u la dawa ban panmap da kaba tyngeh.
U Gogoi, uba long u Symbud nongïalam jong ka seng Congress ha Lok Sabha, u la kynthoh ïa ka jingong jong u Sarma, ba ki kynthei Assam “ki la ïapynbeit” ban ïoh kam ïoh jam, ha ka por ba synshar ka Congress, da kaba ong ba ka long “kaba pynjah burom” ha ka jingthoh ha ka rynsan X.
U la pynksan ïa ka por jong katei ka jingkren, kaba la kren ha ka jingïalang saiñ pyrthei ha ka por jong ka ilekshon Panchayat kaba dang ïaid shakhmat, kum ka jinghiar kaba jur ha ka jingïakren halor ki kam saiñ pyrthei jong ka Assam.
“Ki kynthei Assam ki don ka jingburom bad jingpynkupbor kaba khraw ha ka imlang sahlang,” ong u Gogoi, da kaba pynpaw ïa ki jingnoh synñiang jong ki ha ka histori.
“U Myntri Rangbah u la dei ban long uba la san bha na ka bynta ban panmap.”
Kane ka jingïakynad ka mih na ka jingkdew jong u Sarma ïa ka jingkren jong u nongsakhi ha ka kaiphod jong ka Justice (Retd) Biplab Kumar Sharma Commission, kaba tohkit ïa ki jingbym ïahap ha ki eksamin jong ka Assam Public Service Commission (APSC) jong u snem 2013-2014.
Ha ki jingïalang ha ka 28 tarik u bnai, Ïaïong, u Sarma u la kdew ïa katei ka jingkren, da kaba kynnoh ba ki kynthei “ki la hap ban shim ïa ka lynti kaba bakla” na ka bynta ban ïoh kam hapoh ka jingïalam jong ka Congress.
Ka Assam Congress ka la mudui bun tylli ki jingujor sha ki pulit pyrshah ïa u Sarma ha ka sngi Palei, da kaba kynnoh ba u la kren beiñ ïa ki kynthei. Katba ki pulit ki la pynthikna ba ki la ïoh ïa ki jingujor, hynrei kim pat shym la buh jingthoh ïa ki jingmudui ejahar, da kaba pynpaw ba ka jingtohkit ka dang ïaid shakhmat.
