Shillong, Jymmang 08
U Myntri ba khmih ïa ka tnat Pule-Puthi ha ka Jylla, Rakkam A Sangma u la ïathuh ba haduh mynta na kumba 79 tylli ki kolej ba don ha ka Jylla, tang 22 tylli kiba la mynjur ban pynïasoh noh bad ka Captain Williamson Sangma State University.
U la ong ba ka kam ha kaba ïadei bad ka jingpynïasoh ki kolej sha ka skulbah ka Jylla ka la ïaid shakhmat, bad bynrap ba ka jingthmu jong ka skulbah ka Jylla kam dei tang na ka bynta ban pynlait ïa ki samla pule na ka eksamin CUET, hynrei ka dei na ka bynta ban pynbha shuh-shuh ïa ka pule puthi ha ka Jylla.
“Ki kam ki la ïaid ban pynïasnoh ïa kine ki 22 tylli ki kolej bad ka State University,” u la ong.
Kat kum ka jingïathuh u Myntri kumba 50 tylli na ki 79 tylli ki kolej ki dang pynïasoh beit bad ka North Eastern Hill University (NEHU) haduh mynta.
“Palat 50 tylli ki kolej ki dang pynïasoh beit bad ka NEHU, kin sa pyrkhat bad rai,” u la ong, da kaba bynrap ba ka CUET kam dei ka jingeh namar ba ki samla pule da kaba suk ki lah ban pass.
“Nga ngeit skhem ba ki samla pule jong ngi ki la pynkhreh bha ban ïakhun ïa ka eksam CUTE, bad ka Sorkar ka don ban peit ïa ki jingeh jong ki khynnah,” u la ong.
U la ong ba ka jylla kam don kano kano ka jingeh ban pdiang klas ïa ki samla kiba pass klas XII bad kito kolej kiba pynïasoh sha ka State University ka jylla, kim donkam ban ïaleh ïa ka CUET.
Ha kawei ka liang u Rakkam u la pyntip ba ki kolej thymmai ka sorkar ha Mawphlang, Sohra, Baghmara, Williamnagar kin pdiang klas noh ha ka laiñ Science, Commerce bad ka Patharkhmah kolej kan pdiang klas ha ka laiñ Arts.
U la ong ba ka samoi sdang klas ba thymmai ïa ki samla pule Undergraduate kan sa sdang naduh u Naitung-Nailar ban wan.
Haba kylli, u la ong ba ki samla pule kin ym ïakynduh jingeh satia haba ïadei bad ka jingïoh rung klas.
U Rakkam u la pyntip ba artaïew mynshwa u la lum ïa ka jingïalang halor kane kajuh ka kam ha Tura, ha kaba u Principal ka Don Bosco Higher Secondary School u la pyntip ba kim shym la ïoh khynnah satia ban wan pule, bad ka jingduna ka long haduh 150 ngut ki samla pule ban pyndap ïa ka jaka ha katei ka skul.
