Khliehriat, Jymmang 08
U District Medical & Health Officer (DMHO) jong ka East Jaiñtia Hills, Khliehriat u la pyntip ba kat haduh u bnai Ïaïong (April) 2025 ki la don hynriew tylli ki jingjia ngat bih na ka jingbam ïa u tit ba long bih, ha kaba na ki 15 ngut kiba shah ktah 6 ngut dei kiba la duh noh la ka jingim.
Haba pynshai sha ki paidbah u DMHO u la ong, kum kine ki jingjia ki jia khamtam ha ki thaiñ nongkyndong ha kaba ki briew ki ju leit ban kheit ïa ki tit khlaw bad bam kum ki jhur. Naduh kiba la rangbah haduh kiba dang khynnah ki lah ban ngat, ha kaba ka aïom lyiur Ïaïong haduh u Risaw ki dei ki por kaba don ka jingma kaba khraw tam.
Ka jingngat bih na ka jingbam ïa u tit ka jia na ka jingbym tip bad ka jingbym ithuh ïa ki jait tit bad ka daw ka long namar ba ki don bun jait ki tit kiba ïasyriem ha ka rukom long ka rong bad ka dur ka dar kaba salonsar jong ki jait tit bad kito kiba long ban bam.
Ki dak ki shin kiba paw na ka jingïoh bam ïa u tit ba long bih ki kynthup ïa ka jingshitom kpoh, ka jingtlot, ka jingkynroi prie bad ka jingktha, bad ha kito kiba kham jur ka ju don ka jingsliang, ka jingmih syep, jingruma, jingbym tip briew bad ka ktah ruh ïa u dohnud.
Kane ka bih na u tit ka dei kaba la pynmih hi na u tit. Kiba bun ki tit kiba ktah ïa u briew kim dei na ka daw ka rukom shet, ka jingbuh ha ki tin, ka jingpynpjah lane da kiwei ki rukom buh.
Ka jingïapher hapdeng u tit ba long bih bad u tit uba long ban bam, haba ot ïa u tit ba long bih u kylla rong jyrngam ne ‘purple’ bad haba mad u long kumba kynthah ïa u thylliej, bad u don ka jingsma kumjuh ka jingmad kaba kthang, um don ïa ki wieh bad u don dak na khlieh.
Katba u tit uba long bam haba ot khyndiat um pynmih ïa ka kynja rong bad haba mad khyndiat bad um kynthat ïa u thylliej bad um don ka jingsma bad u don ka jingmad kaba thiang, u don ïa ki wieh bad um kham don dak ha khlieh.
Kumta ka long kaba donkam ban ai jingpynshai sha ki paidbah ha kaba ïadei bad ki jingma na kaba bam kulmar ïa u tit haba don ka jingartatien lane lada ym lah ban ithuh.
U DMHO u la kyntu ïa ki paidbah ban long kiba husiar bha ïa ki jaka ba leit kheit tit bad thied ïa ki tit tang na ki nongdie kiba phi lah ban shaniah, bad ym dei ban thied ïa u tit uba lada um long uba khuid bad pyni ïa ka dak ba la sniew bad don ki dak thoh rong nalor kiwei hynrei dei ban da sait khuid bad ban shet bha ïa u tit ha shwa ban bam bad ban wad mardor ïa ki lad jingsumar lada suba ngat bih na u tit.
