Shillong, Jymmang 08
Hadien ka jingïakhun jong ka Champions League ha kaba ka Paris Saint-Germain ka la lah ban pynliem noh ïa ka Arsenal da 2-1 kol na ka bynta ban tam da 3-1 ha ka aggregate, ki bor synshar ka France ki la pyntip ba ki la don 47 ngut kiba la shah kem ha Paris bad 3 ngut kiwei pat ki la mynsaw na ka daw jong ka jingïatyngkhuh kali, kumba la pynbna ha ka sngi Palei.
Ka PSG kaba la ïoh rung sha ka final ka ban long ha ka 31 tarik mynta u bnai, hadien ba ka la jop da 2-1 ïa katei ka kynhun ba khlaiñ bor na England ha ka sngi Palei, ka la ïoh ban lehkmen ryngkat ki nongkyrshan ha Paris namar ka don jingkyrmen ban rah ïa ka nam lahduh kaba nyngkong ha ka Champions League.
Katkum ki khubor, la ong hajan ka Champs-Elysees, kawei ka kali Mercedes, ka la tynrah ïa ki nongleit nongwan, ha ka por ba pynlong ïa ka jinglehkmen, ha kaba ki pulit, ki la pynpaw ba ki “jinglong-jingman kan long kaba shai haduh mynta”. Uwei uba la ngat ha katei ka jingjia, uba la ithuh kum u khynnah rit, u la shah sumar ha ka jaka sumar namar ka jingmynsaw jur, la ïathuh kiba sakhi ïa katei ka jingjia.
Te kumta na ka liang ki bor pulit ki la sdang ïa ka jingtohkit kaba kynthup ïa ka jingshah thombor, ka jingmih na ka jaka ba jia aksiden bad ka jingbym lah ban ai jingïarap ïa u briew uba la ngat ha katei ka jingjia.
La ong ba ki briew kiba shong ha katei ka kali ki la pyrshang ban phet krad, hynrei ki la shah khanglad noh ha ki paidbah.
Ki bor pulit ki la ïathuh ba ka la don ka jingïakynad bad kawei ka kynhun ha kaba ki la kawang da ki kynja tiar sha ki.
Ha kawei pat ka liang la ïathuh ba ki don saw tylli ki kali kiba la shah pynjulor, ha kaba ar tylli ki la shah thang hajan ka Champs-Elysees.
Te kumta ki bor synshar ki la pynkhlaiñ haduh 2,000 ngut ki pulit pahara na ka bynta katei ka jingïalehkai kaba dei artad ka jingrakhe ïa ka jingdap 80 snem jong ka jingshah rem ka Nazi Germany ha ka thma bah ba ar.
Ki paidbah nongkyrshan ki bym don tiket ki la ïalum lang shabar ka Parc des Princes Stadium ha ka por ba dangïaid ka jingïakhun.
Wat lada na ka liang ki pulit ki la tuklar ban teh lakam ïa ka dheng kali hapdeng katei ka jingrakhe, hynrei ki la ïathuh ba ym shym la don ki jingjia kiba sngewsih hajan ka madan.
Ha ka Fontainebleau kaba don marjan, ki bor pulit ki la pynpra ïa kumba 500 ngut ki paidbah kiba la sdang ban thaw jingkulmar da kaba pyndonkam da ki jingpynbthei lyer pynsat khmat.
