New Delhi, Jymmang:
Katkum ki kaiphod, la ong ba ka la shim por tang 25 minit ia ka India ba kan siat haduh 24 tylli ki ‘namding shisien siat sha khyndai tylli ki ktem jong ki lehnoh Pakistan, ha kaba ka la ioh pynliem haduh 70 ngut ki lehnoh kiba don ha Pakistan bad ha Pakistan-Occupied Kashmir. Katei ka jingsiat jong ka India ka la jia ha ka por 1:05 haduh 1:30 jong ka step Sngi Balang (7 tarik Jymmang 2025), hapoh ka prokram ‘Operation Sindoor’ jong ka tnat shipai ryngkew bad ka tnat shipai liengsuiñ ka India.
Ha ka jingïakren bad ki nongthoh khubor ha New Delhi, u Secretary kam bar ri- u Vikram Misri uba la synran lang da u Colonel Sophia Qureshi bad ka Wing Commander ka Vyomika Singh, u la ong ba kane ka sienjam jong ka India ka long ka kput bad ka jingsneng bad ha kajuh ruh ka por ka long ka jingmaham ia kitei ki lehnoh jong ka Pakistan haba iadei bad ka jingwan thombor jong ki lehnoh ha ka 22 tarik u Iaiong ha Pahalgam, Jammu & Kashmir. Katei ka kam thombor, kaba la tip shai ba ka dei ka kam jong ki kynhun lehnoh kiba don ha Pakistan, ka la shim ia ka jingim jong 26 ngut ki briew nong India, kynthup ia uwei u nong Nepali bad ka la pynmynsaw ia kiba bun kiwei pat kiba ngat ha ka jingleit thombor jong ki lehnoh ka Pakistan ha katei ka sngi.
Kumta, u Colonel Qureshi u la ong ba kane ka jingpyni bor jong ka India ha kane ka sien, ka long ka jingmaham ba tyngeh ia ka Pakistan ba kam bit ban ai jingkyrshan ne ai jaka rieh ia kitei ki lehnoh jong ka. Ha kine ki lai phew snem ba la dep, ka Pakistan ka la pynneh bad pyniar ïa ki ktem jong ki lehnoh, kynthup ïa ki jaka pynrung kam, ki jaka ai jinghikai, bad ki jaka pynher liengsuiñ.
