Shillong, Jymmang 08
Ka jingthmu ban pynkylla ïa ka Meghalaya ka la ïaid shaid-shaid, khamtam ban pynitynnat ïa ka sor Shillong, ha kaba ka thaiñ Polo kaba dei shi bynta jong ka Beautification Project ka Shillong, la lah ban pyndep noh ïa ka Polo Mall bad ka Riverfront Development Project.
U Myntri Rangbah ka Jylla, Conrad K Sangma ha ka sngi Palei u la hiar jurip ïa kine ki projek bad pynbna ba ka jingtei ïa ka Polo Market Complex ka la dep. Kane ka projek mynta ka la ïaid ha ka jingaiwai ïa ki dukan bad kiwei-kiwei ki jaka jong ka complex, ïa kaba la khmih lynti ban pyndep hapoh ka 2-3 bnai.
Ka Polo Mall ka dei u mawbyrsiew jong ka Polo Beautification Project, kaba la tei ha ka jaka ba ïeng ka ïew Polo barim bad ka jingthmu jong ka projek, kaba la pyntrei hapoh ka Shillong City Project, ka long ban pynkylla ïa ka Polo kum ka ‘Time Square’ da kaba tei thymmai ïa ka.
“Ki jingtrei jong ka Polo Mall ka la dep lut. Mynta ka la ïaid ka jingaiwai ïa ki dukan hapoh ka mall bad ngi kyrmen ba hapoh kine ki khyndiat bnai, katto-katne na ki dukan kin sa plie noh. Ka don ruh ka jaka pynbyrngia (entertainment centre), ka don ka jaka ba die bam, ki don ki jaka kiba heh ban thied ban pet. Nga kmen ban ïohi ba ki kam ha Polo Mall ki la ïaid stet bha. Ha kine ki khyndiat bnai ban wan, ngi dei ban ïohi ïa ka jingplie ki dukan bad kiwei-kiwei,” la ong u Conrad hadien ka jingjurip.
Kane ka Mall ka dei kaba la pyntrei ha ka jinglut kaba kot T.85 klur, bad la pynheh ïa ka jingtei ha ka jaka ba 1.5 lak sq. ft. Kane ka jingtei ba hynriew mala kan don haduh 90 tylli ki dukan bad ki jaka pynïeng kali.
U Myntri Rangbah u la leit jurip ruh ïa ka Riverfront Development Project ha Polo, kawei pat ka projek ba kongsan ïa ka Jylla haba phai sha ka jingpynitynnat ïa ka Shillong bad ïa ka jingwan jong ka National Games, 2027 hapoh ka Nongbah.
“Ki don ar bynta jong kane ka projek, kawei ka dei ka jingtei harud jong ka wah Umkhrah bad ruh ka jingpynkhuid ïa ka wah,” u la ong.
U Conrad u la ong ba ka bynta ba nyngkong jong ka projek ba kynthup ïa ki kam tei jingtei, ki la ïaid stet bha bad la khmih lynti ban pyndep shwa ban kut une u snem ba mynta lane haba sdang u snem thymmai, hapoh u snem mang tyngka 2025-26.
Ka bynta ba ar kan ïohi ïa ka jingnang mih ki dukan rit, ki jaka bam, ki jaka pynïeng kali, ki ïingbasa ïa ki nongïalehkai.
U Myntri Rangbah u la ban jur ruh ïa ka jingïashim bynta lang jong ki Dorbar Shnong bad ki nongshong shnong ban seisoh ka projek.
